- A eurodeputada denuncia ante a Comisión Europea que a corta de fragas e a eucaliptización son incompatibles coa Directiva de Hábitats
- Reclama maior protección para estas especies que habitan na comarca de Bergantiños e das que cada vez quedan menos exemplares na UE
Santiago, 6 de novembro de 2018. A eurodeputada galega Lídia Senra denunciou este martes na Comisión Europea (CE) o perigo ao que se están vendo sometidas por culpa da eucaliptización no concello da Laracha (A Coruña) especies como a Píntega Galega ou Rabilonga (Chioglossa lusitanica) e o Caracol de Quimper (Elona Quimperiana), que están protexidas polo Convenio de Berna relativo á Conservación da Vida Silvestre e do Medio Natural en Europa e pola Directiva de Hábitats da UE relativa á conservación dos hábitats naturais e da fauna e flora silvestres. Senra rexistrou esta mañá en Bruxelas un escrito dirixido á CE no que informa ao ente comunitario de que a pesar da protección da que gozan estas especies das que cada vez quedan menos exemplares na UE, a súa supervivencia estase vendo ameazada nos montes do lugar do Pazo, en Soandres, e no río Acheiro, todo no concello da Laracha da comarca de Bergantiños, debido á plantación de eucaliptos nesta zona e á intención de levar a cabo cortas de fragas de árbores autóctonas.
Neste sentido, Lídia Senra pregúntalle á CE se non cre que plantar eucaliptos e cortar fragas é incompatible coa conservación dos hábitats naturais da fauna e flora silvestres protexidos mencionados. Tamén lle pide que especifique que medidas están obrigados a tomar tanto o goberno municipal como a Xunta de Galicia e o Estado español para protexer estes lugares e estas especies.
Ademais, e tendo en conta que a previsión do Plan Forestal da Xunta no 1992 era dun máximo de 245.000 hectáreas de eucalipto para o 2032 e hoxe xa temos arredor de 500.000 hectáreas con eucaliptos na Galiza, a eurodeputada pregúntalle á CE que opinión lle merece esta situación e que recomendacións fai para protexer as especies arbóreas autóctonas e evitar que continúe a eucaliptización da Galiza.
Senra considera fundamental protexer de verdade, non só no papel, os montes e as augas e as especies que viven nelas fronte aos intereses das industrias madereiras que están a acabar co patrimonio natural galego coa complicidade das Administracións que, ou ben miran para outro lado, ou permiten directamente que se arrase co noso medio rural. Así, chama a todas as Administracións a levar a cabo medidas efectivas para protexer o rural e toda a vida que nel hai.
En efecto, xa son moitas as iniciativas que leva presentado a europarlamentaria en Bruxelas para denunciar a eucaliptización na Galiza. A maiores do escrito presentado hoxe en referencia á situación na Laracha, Senra ten reclamado en numerosas ocasións que se inclúa o eucalipto na lista de especies exóticas invasoras preocupantes para a Unión, ten denunciado a plantación desta especie en Monforte, e de feito está a impulsar a constitución en réxime de autoconvocatoria dunha plataforma por un sur de Lugo libre de eucaliptos. Tamén ten organizado xornadas no Parlamento Europeo referidas á desfeita do noso patrimonio provocada pola industria do eucalipto-celulosa na Galiza e ten intervido no pleno parlamentario europeo neste sentido.
