Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), interviu este mércores na Comisión das Pescas do Parlamento Europeo, para defender a pesca artesanal e a acuicultura a pequena escala. A eurodeputada asegurou en Bruxelas que, de non cambiar e poñer enriba da mesa a problemática actual, “a pesca artesanal e a acuicultura a pequena escala converteranse probablemente en non moito tempo nun obxecto de museo”. Fronte e isto, Senra reclamou “coherencia” e que se poñan en marcha políticas que defendan e potencien este tipo de actividades en lugar de políticas que provocan o seu afogamento.
A eurodeputada afirmou que o desenvolvemento da chamada economía azul, “vai ser un golpe duro” para estes sectores e para as mulleres e homes que viven da pesca e do marisqueo. “En Galiza temos o exemplo dunha Lei de Acuicultura que pretendía desenvolver o Goberno galego e que tivo que ser retirada porque foi moi contestada polo sector porque era unha auténtica ameaza para a pesca artesanal e a acuicultura a pequena escala”, lembrou Lídia Senra, ademais de advertir que nun futuro non moi lonxano a explotación mineira dos fondos mariños ou os proxectos para o aproveitamenteo da enerxía das ondas ou das mareas ou de grandes parques eólicos no mar van ser un novo “ataque en toda regra á pesca artesanal e á pesca en xeral”.
Sobre a promoción do peixe e o mercado dos productos resultantes da pesca artesanal, Lídia Senra instou ás Administracións públicas para que entendan que unha parte moi importante da saída de consumo da pesca artesanal e da acuicultura a pequena escala está nos comedores dos colexios e do hospitais públicos. “En Galiza, os hospitais e escolas están sendo abastecidos con peixe importado a moi baixo prezo que destrúe economías locais tanto na Galiza como en países terceiros”, denunciou, e chamou a cambiar esa situación.
Vídeo da intervención completa aquí
