- O comisario Karmenu Vella toma nota da denuncia da eurodeputada galega e chama aos Estados a “ter en conta os criterios medioambientais e sociais” no reparto das cotas
- A europarlamentaria reclama na Comisión de Pesca que se adopten medidas fronte ao impacto que ten a contaminación das augas na reprodución das especies, tamén nas de interese para a pesca
Bruxelas, 23 de marzo de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), participou este xoves pola mañá en Bruxelas no debate que os membros da Comisión de Pesca do Parlamento Europeo mantiveron con Karmenu Vella, comisario do ramo, sobre o diálogo estruturado que fará balance do traballo destes últimos anos e as previsións para os dous próximos en materia de asuntos marítimos. A eurodeputada galega preguntou que medidas pensa tomar a Comisión Europea ante a discriminación no reparto ao dereito a pescar entre os Estados e, dentro destes, entre os países e as diferentes frotas, e interesouse tamén pola contaminación das augas, “unha gran preocupación entre as comunidades pesqueiras polo seu impacto na reprodución das especies e polo tanto nas especies de interese para a pesca”.
Karmenu Vella respondeu que “son os Estados membros” os que fan a distribución dos Totais Adminisibles de Capturas (TAC) entre a frota do país e que dende a Comisión “instáse a que se teñan en conta criterios medioambientais e sociais nese reparto”. “Unha vez máis, a Comisión elude a súa responsabilidade”, valorou Senra a posteriori, xa que “se ben é certo que o reparto interno é cuestión dos Estados, tamén é certo que son responsabilidade europea os criterios para asignar o dereito a pescar entre os Estados.
No relativo á contaminación dos océanos, Vella recoñeceu que a Comisión “non está a ser capaz de poñerlle freo”. Mencionou as medidas relativas a evitar a contaminación por plásticos incluídas no paquete de economía circular e dixo que a Comisión fará a finais de ano unha proposta de estratexia específica para a reciclaxe do plástico e frear deste xeito o seu vertido aos mares.
