- Reclama tolerancia cero co machismo e pelexar para ter feministas nos postos que responsabilidade que a cotío continúan a ocupar os homes
- Medio cento de persoas asisten á xornada sobre empoderamento organizada no salón de plenos municipal de Cangas pola eurodeputada
Cangas,11 de novembro de 2017. A eurodeputada galega Lídia Senra advertiu este sábado en Cangas “dun retroceso moi forte” nos dereitos das mulleres, “mesmo dentro das propias organizacións de esquerda ás que pertencemos ou coas que traballamos”. Fíxoo durante a primeira parte da xornada “O empoderamento das mullleres na esquerda política social”, un evento organizado por ela como membro do Grupo Confederal da Esquerda Unitaria Europea/Esquerda Verde Nórdica (GUE/NGL). No coloquio “Mulleres implicadas política e socialmente fronte ao machismo diario que continúa a imperar na maioría de organizacións de esquerda”, Senra defendeu como “moi importante” organizar encontros deste tipo e fomentar actos de sensibilización para fortalecer as posicións feministas e debater e traballar xuntas para frear o retroceso actual e seguir avanzando.
A europarlamentaria criticou a belixerancia que moitas veces amosan compañeiros de partido cando as mulleres avanzan e criticou os atrancos que se lle poñen ás mulleres para ter presenza nas delegacións de maior importancia. “O tempo que se dedica nas campañas electorais a falar da situación e das propostas das mulleres é mínimo”, criticou. Así, denunciou que a pesar de que os programas electorais se moven no politicamente correcto e teñen capítulos dedicados a defender supostamente os dereitos das mulleres, cando chega o momento da campaña non se fala practicamente nada de medidas para acabar coa fenda salarial coa fenda nas pensións ou coa violencia machista, por exemplo.
Lídia Senra afirmou que a loita feminista ten conseguido espazos nas últimas décadas e asegurou que é triste, pero é así, que “se non nos tiveramos dotado do instrumento das cotas, moitas das mulleres que hoxe están en distintos postos de representación non o estarían”. Parabenizou que moitas leis foron aprobadas grazas á presión das mulleres. Non obstante, chamou a facer moito máis para reverter unha realidade na que, a día de hoxe, por exemplo, nas reunións de órganos de goberno como pode ser o colexio de comisarios da UE habitualmente non se dedique case nada de tempo a falar de proposta para combater a gravísima lacra da violencia machista.
Así, chamou a exercer a “tolerancia cero” co machismo, aínda que quen o exerza sexan compañeiros de partido ou de escano e reclamou que se poñan enriba da mesa sempre todas as agresións machistas. Senra enumerou unha serie de prioridades a levar a cabo, entre as que citou a necesidade de seguir a fortalecer espazos nos que debater as mulleres para poder encauzar as batallas. Tamén cre necesario revisar como se fan as listas electorais. “Aínda que conseguimos que se fagan listas paritarias e que cada vez máis mulleres accedan ás institucións, o certo é que os primeiros postos continúan a reservarse para homes. Cantas mulleres hai alcaldesas, secretarias xerais ou portavoces?”, preguntouse. “Parece que temos ese tope que non damos saltado e isto ten que cambiar, debemos debater como se están a aplicar as cotas”, dixo. Así, instou a pelexar para ter feministas en todos os espazos e tamén cre necesario realizar unha avaliación en profundidade sobre que é o que está fallando na aplicación das leis actuais para que a violencia machista continúe a ser unha lacra. “Hai falta de recursos e tamén un déficit de formación en quen ten que aplicar a lei, sexan funcionarios/as ou xuíces ou xuízas”, considerou. Por iso, dixo, é necesario avanzar na aprobación e implementación de leis ambiciosas e fortes que defendan os dereitos das mulleres, pero se nin sequera se aplican as que xa hai, podemos seguir aprobando novas, que non conseguiremos case nada e estaremos ante iso de que quen fai a lei fai a trampa e seguirán sen aplicarse como se teñen que aplicar.
No coloquio tamén interveu como relatora a concelleira de Marea Marín Sandra Pesqueira, quen na mesma liña que Senra criticou que efectivamente, nas organizacións sociais, políticas e sindicais de esquerda que se declaran feministas seguen vixentes prácticas entre compañeiros que deberían estar desterradas hai tempo e que de feministas non teñen nada. “Nos debates, nas iniciativas, sempre hai algo supostamente máis importante ou prioritario que impide que as reivindicacións das mulleres sexan tratadas coa prioridade que se merece. E xa é hora de comezar a poñer a loita feminista como prioridade nas organizacións de esquerda. Temos que ser nós, as mulleres, as que fagamos que as cúpulas das organizacións de esquerda cumpran o que din ser. Queremos accións, non escusas. A paciencia xa rematou”, dixo Pesqueira.
A edil de Marín criticou que habitualmente cando as mulleres accedemos a postos políticos de responsabilidade é para ocupar aquelas áreas que se corresponden máis co ámbito privado da sociedade, áreas de servizos sociais, sanidade, educación, mocidade, medio ou turismo, ás que “foi relegada a muller por parte do patriarcado sempre”. Os homes, sen embargo, ocupan o maior peso político e público sempre, encargándose de áreas como facenda, economía, etc. Tamén criticou as prácticas que continúan a ter algúns homes nas asembleas e xuntanzas, que optan por interromper por sistema ás mulleres, desprezar as súas opinións, “facendo que as nosas organizacións non sexan un espazo cómodo”. Fronte a isto, reclamou que “ningunha loita é máis importante que a das mulleres”. “Só temos que empoderarnos e ocupar eses espazos que nos corresponden. Abordar o que sucede desde o xermolo da situación”, defendeu.
Margarida López Barreiro, concelleira de Marea de Vigo, exerceu de moderadora do coloquio, ao que finalmente non asistiu a deputada de En Marea no Congreso do Estado español Alexandra Fernández por atoparse enferma. López falou da importancia de decatármonos de “todos os atrancos” que temos hoxe as mulleres nos partidos de esquerda e reclamou constancia na loita.
A xornada continuou pola tarde, cun coloquio titulado “A raíz da violencia machista. Como se desenvolve e como se nos conta a historia”, no que interveu a profesora da Complutense de Madrid que ten realizado numerosos traballos de análise da violencia machista nos medios de comunicación e no cine, canguesa de nacemento,Asunción Bernárdez Rodal. A membro de Alternativa Canguesa de Esquerdas, Andrea Bernárdez, moderou o debate.
