- Prezos remuneradores, medidas de acción positiva para as labregas, anticipar axudas á incorporación da mocidade, eliminar dereitos históricos
- Senra presentará emendas para asegurar que a figura de “agricultor/a xenunino/a” corresponda inequivocamente ao campesiñadoBruxelas, 21 de Novembro de 2018. Na sesión da Comisión de Agricultura e Desenvolvemento Rural do Parlamento Europeo celebrada esta mañá abordáronse varios informes relativos a distintos aspectos da Política Agraria Común (PAC) a implementar a partir do 2021 [Orde do Día]. A eurodeputada galega Lídia Senra, coordenadora do Grupo da Esquerda Unitaria Europea-Esquerda Verde Nórdica (GUE/NGL) nesta comisión, tomou a palabra no punto adicado ao establecemento de normas en relación á axuda aos plans estratéxicos que deben elaborar os Estados membros no marco da política agrícola común financiada a cargo do Fondo Europeo de Garantía (FEAGA) e ao Fondo Europeo Agrícola de Desenvolvemento Rural (FEDER), presentando unha batería de medidas para situar o campesiñado e a Natureza no centro da nova política agroalimentaria europea a implementar a partir do 2021. “Nós reiteramos que as políticas agroalimentarias europeas deberían ser repensadas no seu conxunto. Se queremos resultados distintos aos actuais, debemos implementar un novo modelo de Política Agraria Común”.
Apelando a unha mellor distribución dos orzamentos públicos, Senra destacou que a garantía de prezos que cubran os custos de produción e remuneren o traballo labrego ten que estar no núcleo da nova PAC. “O campesiñado non quere ser un sector subvencionado, quere vivir con dignidade da venda dos seus produtos, os alimentos”.
Outra modificación da actual aplicación orzamentaria da PAC debería abordar a cuestión da incorporación da mocidade á actividade agraria. “Estamos a falar do futuro da produción da alimentación na UE, pero tamén do futuro do medio rural europeo. As axudas á incorporación teñen que concederse de xeito anticipado, non poden seguir adicándose de xeito moi importante a pagar os xuros bancarios, como está a pasar actualmente.”
A eurodeputada galega tamén subliñou na intervención desta mañá a súa aposta pola eliminación dos dereitos históricos e o establecemento de topes para as axudas que sexan máis baixos que a proposta actual, máis claros e de cumprimento obrigado. “Propoñemos un sistema de topes organizado en 3 categorías: alta montaña, zonas desfavorecidas e resto de zonas.”
Ademais, abondou, a nova PAC debería establecer mecanismos fortes para garantir que as axudas só son concedidas a explotacións que están desenvolvendo modelos produtivos que claramente están orientados a preservar o medio ambiente e a loitar contra o quecemento global. “Todo o que estea fóra de aí non debería recibir axudas públicas da PAC”, aseverou Senra. “O que queremos é unha verdadeira redistribución das axudas, de tal xeito que as perciban só as labregas e labregos. Neste sentido imos presentar emendas para aportar unha definición de “agricultor/a xenuíno/a” que realmente se axuste ao campesiñado.”
