- Participou nun acto en Sarria en favor dos presos de GdeimIzik que está xulgando Marrocos, organizado por Resistencia Saharaui e a Asociación Cultural Rúa da Música
- Insta a cumprir a sentenza do Tribunal de Xustiza da UE e non permitir que Marrocos exporte produtos acaparados no Sáhara Occidental
Santiago, 4 de xullo de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), participou este sábado pasado pola noite en Sarria (Lugo) nun acto pola liberación dos 24 presos políticos saharauis encarcerados pola súa participación no campamento GdeimIzik, que están a ser xulgados pola xustiza marroquí por reivindicar o dereito de autodeterminación do pobo saharaui e o seu dereito a ter acceso aos seus recursos naturais. O evento, organizado por Resistencia Saharaui, en colaboración coa Asociación Cultural Rúa da Música, congregou a varias decenas de persoas que se xuntaron para informarse e debater sobre a situación actual saharaui, ver o documental “GdeimIzik, o campamento da Resistencia Saharaui” e gozar coa música de Noe González e Borja López, TheCoolExperience e Yslem Fillo do Deserto.
Lídia Senra reivindicou a importancia de organizar actos deste tipo en cantos máis lugares mellor para facer avanzar a causa saharaui e reivindicar a liberación de todos os presos políticos saharauis encarcerados inxusta e ilegalmente por Marrocos. Estes 24 presos foron detidos a partir do desaloxo do campamento en novembro do 2010, cun despregamento brutal das forzas de ocupación marroquís e facendo uso do fogo, a pesar de estar decretado o alto dende o acordo que puxo fin á guerra entre Marrocos e a Fronte Polisaria. Todos son cabezas visibles dunha xeración de activistas de territorios ocupados, dirixentes de organizacións de defensa do dereitos humanos saharauis, contra o expolio dos recursos, de organizacións a favor da memoria colectiva, etc. Tiveron que afrontar xuízos militares marroquís, a pesar de ser civís, e foron condenados incluso a cadeas perpetuas por defender o dereito do pobo saharaui a decidir, acusados de pertencer a organización criminal sen proba algunha nun proceso claramente político. Neste sentido, Senra asegurou que está vendo as posibilidades na súa axenda para poder asistir como observadora internacional ao reinicio dos xuízos que terán lugar este mes en Marrocos. E é que a raíz da presión internacional, están a volver a xulgar a este presos, agora nun tribunal civil, xa non militar, aínda que sigue a ser marroquí. Desde o decembro pasado, as sesións xudiciais suspendéronse até en 5 ocasións para evitar a presenza internacional.
Como sinalou Elvira Hernández, conselleira do GUE/NGL no Parlamento Europeo e observadora no xuízo militar de GdeimIzik, “o novo xuízo contra o grupo de GdeimIzik, a pesar de que é ante un tribunal civil, constitúe unha nova vulneración do IV Convenio de Xenebra sobre defensa e protección da poboación nos territorios ocupados. É ilegal que Marrocos traslade e xulgue a civís fora do territorio saharaui. Ademais, os Acordos de Madrid de 1975 polos que España transfería o Sáhara Occidental a Marrocos e Mauritania son ilegais posto que a soberanía dun territorio non autónomo non é transferible e España ten a obriga de descolonizar”.
Pola súa parte, Uxía Castro, membro de Resistencia Saharaui, sinalou a importancia de GdeimIzik na historia da loita pacífica do pobo saharaui pola súa independencia. “Por iso non debemos esquecer aos activistas de dereitos humanos presos por organizar o Campamento da Dignidade Saharaui e temos que seguir denunciando a brutalidade da política penitenciaria marroquí contra eles, incluídas torturas recoñecidas polas Nacións Unidas cuxo Comité contra a tortura condenou a Marrocos o pasado 12 de decembro.
A eurodeputada, na súa quenda, denunciou que detrás do conflito está a reivindicación saharaui do seu dereito á autodeterminación, que lle seguen a negar, e o seu dereito ao acceso aos seus recursos naturais. Así, Lídia Senra asegurou que Europa non está a facer nada para que se cumpra a sentenza dictada polo Tribunal de Xustiza da UE en decembro do 2016 e que ditaminou que o Sáhara Occidental é unha rexión que non forma parte do “territorio do Reino de Marrocos” e que polo tanto o acordo de comercio non pode incluír que Marrocos exporte á UE produtos acaparados, como os derivados da pesca, minerais ou de horta, no Sáhara. “Neste conflito, os intereses da UE, das multinacionais e das elites gobernantes cos que se chega a acordo están detrás do feito de que se impida realizar un referendo e que o pobo saharaui goce do dereito de autodeterminación”, afirmou Senra.
A parlamentaria galega denunciou as altas exportacións de fosfatos que fai Marrocos, por exemplo, e tamén que a pesar de que os acordos de pesca son ilegais, iso no impide que hoxe se siga vendendo na UE polbo pescado nas augas territoriais do Sáhara Occidental, por exemplo, ou aceite de peixe, etc. Os intereses do rei de Marrocos na industria de produción tomateira, ou os intereses das industrias de enerxía eólica e solar, así como das petroleiras nesta zona está no fondo do conflito, dixo.
As tres intervintes fixeron fincapé en que, tanto á UE como á ONU que deixen de mirar para outro lado e esixan que se cumpra o dereito á autodeterminación do pobo saharaui, internacionalmente recoñecido. Tamén reclamaron ao goberno do Estado español que deixe de facer como se España non tivera responsabilidade algunha no conflito do Sáhara Occidental, porque segundo o dereito internacional segue sendo a potencia administradora do territorio non autónomo, última colonia en África.
