- A eurodeputada estará no Centro Cultural Reacreativo de Chantada, este sábado ás 17:00h, para intercambiar claves sobre o futuro da PAC
- A membro do Parlamento Europeo chama a tomar conciencia de que esta Política afecta non só a agricultores/as, senón a toda a sociedade galega
Santiago, 9 de novembro de 2018. A eurodeputada galega Lídia Senra está a ultimar as emendas que presentará a principos de decembro no Parlamento Europeo aos regulamentos que van fixar a que será a nova Política Agraria Común (PAC) para o período 2021-2027. Senra está a traballar intensamente co sector agrícola e gandeiro e coa xente que vive no rural na Galiza, ante a constatación de que “semella que todos os Estados e lugares da UE están traballando duramente para lograr acordar unha PAC beneficiosa para as súas realidades. En todos, menos na Galiza”, denuncia a eurodeputada, que critica deste xeito aos responsables da Xunta por “coa súa actitude e servidume aos intereses das grandes empresas e do capitalismo depredador, non facer máis que afogarnos á poboación galega que non vivimos nas cidades”.
Neste contexto, a eurodeputada ofrecerá este sábado, 10 de novembro, ás 17:00 horas, unha charla no Centro Cultural Recreativo de Chantada, acompañada pola membro do seu equipo Ana Rodríguez Vázquez, e polo concelleiro de Por Chantada Antom Fente Parada. O obxectivo do acto é abordar o futuro da PAC e as novas orientacións e novidades que están enriba da mesa nas institucións europeas e que van afectar moito non só ás persoas relacionadas coa actividade agraria e gandeira, senón a toda a sociedade en xeral.
“A maioría da xente pensa que a PAC simplemente son as axudas que botan unha man aos gandeiros e gandeiras e aos agricultores agricultoras para cubrir gastos. E iso non é así. A PAC é moito máis, é regular a organización dos mercados, dos produtores, do futuro do leite, etc”, explica tamén Ana Rodríguez pola súa banda, para engadir que ademais, por poñer un exemplo, en Chantada o maior receptor de axudas da PAC é o Concello directamente, que cobra máis de 100.000 euros.
Senra considera que todo o que implica a PAC é cada día mais complexo, “nunha artimaña das institucións europeas para que a maioría da poboación non se entere a tempo do que se está a negociar”, e ve fundamental informar á sociedade sobre este tema, máis agora cando se está negociando a Política Agraria Común que rexerá do 2021 ao 2027. “Ao poder interésalle que as políticas europeas nunca estean aquí no centro do debate, porque así unha vez que xa estean aprobadas non haberá volta atrás. Agora mesmo hai tres regulamentos enriba da mesa (Regulamento sobre o Plan Estratéxico da PAC, Regulamento horizontal da PAC e Regulamento de Modificación), presentados pola pola Comisión Europea o pasado 1 de xuño e que a principios de decembro teremos que emendar na Comisión de Agricultura do Parlamento Europeo. É necesario facer todo o posible agora”, explica, lembrando como na actualidade estamos padecendo todas as consecuencias das reformas da PAC anteriores, entre elas, que non haxa regulación de produción nin dos mercados nin prezos mínimos. “Temos que seguir reivindicando un cambio de tendencia”, insiste.
