- Aprobado informe de opinión onte en convocatoria extraordinaria da Comisión de Agricultura en Estrasburgo durante a realización do pleno
- Senra denuncia o procedemento que UE e Marrocos están a desenvolver para eludir a sentenza do TSUE e comercializar cos recursos saharauís
Estrasburgo, 13 de Novembro de 2018. Dando inicio á estratexia posta en marcha para eludir as sentenzas do Tribunal de Xustiza da UE que confirma a ilegalidade dos acordos comerciais e de pesca asinados entre a UE e Marrocos por abarcar recursos naturais do pobo saharuí, a última hora da tarde de onte a Comisión de Agricultura e Desenvolvemento Rural do Parlamento Europeo procedeu á votación e aprobación dun informe de opinión que acompañará ao Acordo en forma de Intercambio de Notas entre a Unión Europea e o Reino de Marrocos sobre a modificación dos Protocolos n.° 1 e n.° 4 do Acordo Euromediterráneo polo que se crea unha Asociación entre as Comunidades Europeas e os seus Estados membros, por unha parte, e o Reino de Marrocos, por outra (0481/2018 – C8-0000/2018– 2018/0256M(NLE)), que a Comisión de Comercio Internacional votará previsibelmente o vindeiro 3 de novembro.
Lídia Senra, coordenadora das deputadas/os do Grupo Confederal da Esquerda Unitaria Europea/Esquerda Verde Nórdica (GUE/NGL) nesta Comisión, presentou un total de 11 emendas a este proxecto de opinión. Ningunha delas foi aprobada. O seguinte paso será a votación dun informe de opinión da Comisión de Pesca na reunión do 27 de novembro, do cal a deputada galega é tamén a responsábel do seu seguimento para todo o GUE/NGL.
“Á marxe das voltas técnicas que lle queiran dar a UE e Marrocos, aquí a cuestión central é que non existe consentimento expreso do pobo saharuí para que poida ser asinado ningún tipo de documento que teña que ver ca xestión dos seus recursos naturais. Ademais, nin sequera se tentou consultar ás 173.000 saharauís que viven nos campamentos de poboación refuxiada”, advertiu Lídia Senra. “A lexítima representante do pobo saharauí é a Fronte Polisario, como así recoñece a propia ONU. Crear un acordo sen o seu consentimento supón a vulneración dos dereitos dos pobos e dos territorios non autónomos.”
Malia a que as institucións europeas están a tentar dotar dun cariz técnico esta estratexia de negociación comercial entre ámbalas partes, o compoñente xeopolítico desta situación é tan patente que mesmo o Goberno de Marrocos non dubida en poñer en marcha medidas de presión para tentar condicionar os votos dentro do Parlamento Europeo.
“A cuestión de fondo a non perder de vista é o lexítimo dereito dos pobos á súa soberanía. A Comisión Europea non só debe dar curso á sentenza do TXUE, senón que ademais ten a responsabilidade de respectar o Artigo 73 da Carta das Nacións Unidas, que compromete claramente a ter en conta as aspiracións políticas dos pobos que habitan en territorios non autónomos”, subliñou.
