- A deputada interésase polo hatchery de ameixas e ostras construído no 2007 no Freixo e que permanece sen actividade desde o 2014
- Reclama un seguimento dos proxectos financiados con diñeiro da UE que quedan inoperativos logo de de facer os 5 anos mínimos esixidos
Santiago, 10 de setembro de 2018. A eurodeputada galega, membro do Grupo Confederal da Esquerda Unitaria Europea/Esquerda Verde Nórdica (GUE/NGL), Lídia Senra, rexistrou esta mañá en Bruxelas un documento dirixido á Comisión Europea (CE) no que pregunta ao ente comunitario pola situación na que se atopa o criadeiro de moluscos bivalvos para ameixa e ostra do Freixo (Outes), que recibiu no seu día máis de 1,2 millóns de euros de fondos europeos e permanece sen actividade desde o 2014.
Senra recolle no seu escrito que no 2006 a Consellería de Pesca da Xunta de Galicia autorizou para a Confraría de Noia o mencionado hatchery. As obras iniciáronse no 2007, cunha subvención da Xunta para construílo de 1.252.932,74 euros. No 2009, as instalacións entraron en funcionamento, ano no que o proxecto recibiu o pago final dunha financiación da UE, asignada xa no 2007, a través do Instrumento Financeiro de Orientación da Pesca, de 1.265.136,53 euros (nº de expediente IFOP-3211GAL0015, acción 321)[1]. “A actividade dese criadeiro cesou no 2014, 5 anos despois de poñerse en marcha, e desde aquela está en abandono, a pesar de que desde aquela cada certo tempo se lanzan novas sobre a súa posible reapertura próxima”, asegura Senra, que xa estivo na zona no ano 2016, momento no que se falaba xa dunha posible reapertura, e a data de hoxe sigue sen abrirse.
Ante esta situación, a eurodeputada pregúntalle á CE se ten constancia a Comisión de que este criadeiro está pechado e de se cumpriu todos os requisitos derivados de ter recibido unha financiación europea como a mencionada. Tamén, en vistas de que é bastante habitual que proxectos financiados con fondos europeos acaben por non desenvolverse de forma responsable, Lídia Senra pregunta á Comisión se feito algún tipo de seguimento sobre os proxectos que superan os 5 anos operativos e os que pechan ao cumprir eses anos mínimos de funcionamento esixidos na normativa europea ou en exercicios seguintes.
Senra critica o mal uso de moitos fondos europeos, que rematan en proxectos de curta duración ou non adaptados ás necesidades da zona, en instalacións que moitas veces non funcionan como deberían e reclama un maior control por parte das Administracións ante o despilfarro de recursos económicos.
A europarlamentaria enviou ademais xa a semana pasada un escrito á Confraría de Noia solicitando poder realizar unha visita ás instalacións do criadeiro, para poder comprobar en persoa a situación na que se atopan. Polo momento non recibiu resposta pero agarda que non se lle negue o acceso e poder realizar esa visita en breve.
____________________________
[1] Aquí pode comprobarse a lista de beneficiarios da financiación da UE a través do IFOP:
