- A eurodeputada denuncia na Comisión Europea que o Concello de Vigo non promove o uso sostible e despilfarra auga incluso en época de seca
- Considera que o proxecto poñería en perigo o futuro de 200 familias que viven do marisqueo na ensenada e afectaría a zona Rede Natura
Santiago, 15 de marzo de 2018. A eurodeputada galega Lídia Senra insta á Comisión Europea (CE) a valorar a posible vulneración de directivas internacionais que suporía o trasvase do río Verdugo, en Ponte Caldelas, para abastecemento de auga da cidade de Vigo. Senra rexistrou en Bruxelas a principios deste mes unha pregunta por escrito dirixida á CE na que informa ao ente comunitario do acordo tomado a finais do ano pasado entre a Xunta de Galiza e o Concello olívico para bombear auga desde o río Verdugo a 350 litros por segundo, o que implicaría ademais reducir o caudal ecolóxico do río Oitavén a 150 litros por segundo, e todo iso a pesar de que malia a alta seca vivida, o embalse principal, o embalse de Eiras, nunca baixou do 37,6% de nivel de auga.
A xuízo de Lídia Senra, o proxecto de trasvase, que está sendo tramitado por vía ordinaria na actualidade, “non promove o uso sostible da auga nin a protección a longo prazo dos recursos hídricos“. Así, a europarlamentaria denuncia que as autoridades galegas propoñen este trasvase ao mesmo tempo que non cumpren as prioridades que se deben levar a cabo en situacións de prealerta e alerta de seca. “Non fixeron nada para evitar que Vigo perda un 30% do abastecemento de auga e que siga despilfarrando auga organizando festas da auga en plena seca, levando a cabo baldeos de rúas con auga potable en alerta de seca, tarificando dun xeito que a máis consumo de auga, menos custe, por exemplo”, denuncia Senra, para cargar tamén contra a Xunta por “non ter creado o Consello Sostible da Auga”.
Ante esta situación, Lídia Senra pídelle á CE que se posicione sobre se o trasvase do Verdugo vai contra a Directiva Marco da Auga 2000/60/CE. Ademais, sabido que unha cuarta parte do río e o seu nacemento está na Rede Natura Serra do Cando, Senra pregúntalle á CE se non debería protexerse máis a biodiversidade e impedir este trasvase que modificaría o ecosistema do río. A eurodeputada fai tamén fincapé en que na ensenada hai ao redor de 200 familias que viven no marisqueo e que verían perigar o seu traballo de levarse adiante o trasvase do Verdugo. “É esto sostible e acorde coas normativas europeas?”, pregunta Senra.
O escrito rexistrado agora por Lídia Senra é resultado da reunión que a eurodeputada mantivo en Ponte Caldelas a finais de xaneiro con membros da Plataforma en Defensa do Verdugo (Pladever) e co portavoz da Marea local, Roi Márquez Rincón.
