- A eurodeputada faise eco do informe de Freemuse e pídelle á Comisión Europea que valore a preocupante falta de liberdade de expresión
- No 2017 foron encarceradas 13 persoas polas súas creacións artísticas, por diante de China (12) e Irán (9), co pretexto da loita antiterrorista
Santiago, 20 de xuño de 2018. A eurodeputada galega Lídia Senra reclámalle á Comisión Europea (CE) que se pronuncie sobre o feito de que o Estado español lidera actualmente o ranking mundial de países co maior número de persoas que son artistas encarceradas. Senra rexistrou hoxe pola mañá en Bruxelas unha pregunta escrita dirixida ao ente comunitario, na que lle achega o informe anual ‘O Estado da liberdade artística. 2018’[1], elaborado pola organización internacional independiente Freemuse, con sede en Dinamarca, e no que se recolle que o español é o Estado do mundo que meteu en prisión a máis artistas durante o ano pasado. Concretamente, foron 13 as persoas artistas encarceradas, por diante de lugares como China (12) e Irán (9). O informe, silenciado polos medios de comunicación maioritarios, apunta a que os tribunais aproveitan as modificacións introducidas na lexislación antiterrorista no 2015 para considerar como apoloxía ou enaltecemento do terrorismo cancións, textos ou fotografías que simplemente son expresións artísticas.
Tendo en conta que a CE en todas as súas manifestacións públicas sempre se compromete de palabra e por escrito a garantir que a liberdade de expresión e a liberdade de reunión se respecten de xeito estrito, Lídia Senra cre que é o momento de que a Comisión pase das palabras aos feitos. Así, ademais de preguntarlle pola súa opinión sobre a situación no Estado español, pregúntalle tamén se pensa contactar coas autoridades competentes para intercambiar impresións sobre esta situación e tomar medidas encamiñadas a garantir de verdade a liberdade e a democracia en todos os Estados membro.
A europarlamentaria considera que casos como o do rapeiro Valtoyc, actualmente exiliado en Bélxica para evitar o cárcere despois de ser condenado a tres anos e medio polas letras das súas cancións; ou o da Insurgencia, grupo de 12 rapeiros entre os que se inclúen galegos, condenados a máis de dous anos de cárcere tamén polas letras das súas cancións; ou o do tamén rapeiro Pablo Hasel condenado xa en dúas ocasións diferentes tamén polas súas letras, a 5 anos de prisión; e moitos outros que estamos a ver e que non son tan mediáticos, certifican que no Estado español a liberdade de expresión está en serio risco de ameaza. “Agora, ademais, todo isto que levamos tempo denunciando, vese corroborado co informe emitido por Freemuse, que constata que lonxe do que se nos quere facer crer moitas veces, a liberdade de expresión non periga só en países lonxanos, senón que o Estado español, por moito que na televisión e na radios e nos periódicos de gran tirada non o recollan, lidera a lista mundial de artistas encarcerados. Isto é inadmisible e a CE debe pronunciarse xa sobre o feito de que un Estado membro da UE estea nesta situación”, defende Senra.
A eurodeputada agarda que desta vez a Comisión Europea non bote balóns fora, como acostuma facer moitas veces, e asuma as súas responsabilidades e compromisos coa defensa dos dereitos e das liberdades fundamentais. Esta non é a primeira iniciativa neste sentido que presenta Senra. En efecto, a europarlamentaria galega xa apoiara hai uns meses outra pregunta rexistrada en colectivo[2] por decenas de eurodeputados e eurodeputadas que incluía a denuncia sobre a censura de ARCO á exposición de Santiago Sierra sobre presos políticos na España do século XXI ou o secuestro xudicial do libro Fariña, do galego Nacho Carretero.
