- As deputadas no Parlamento Europeo e no Galego reclaman que a Xunta actúe e protexa esta xacemento castrexo que hai en Monforte
- Maquinaria pesada abriu pasos para subir á cima, desfacendo zonas de pedra, para talar e levar as árbores arrasadas nos lumes de outubro
Santiago, 9 de agosto de 2018. A eurodeputada galega Lídia Senra, membro do Grupo Confederal da Esquerda Unitaria Europea/Esquerda Verde Nórdica (GUE/NGL), e a deputada de En Marea no Parlamento Galego, Paula Verao, visitaron este mércores pola tarde o castro da Coroa, en Chavaga, Monforte de Lemos, para comprobar en persoa o deterioro que están a provocar os continuos traballos de tala e retirada da madeira que ardeu nos incendios de outubro do ano pasado. Senra e Verao comprobaron no terreo as pegadas e desfeitas provocadas por maquinaria pesada, que abriu pasos para poder acceder á cima do castro, desfacendo incluso muros de pedra deste xacemento castrexo.
Ante tal situación, tanto a eurodeputada como a parlamentaria galega teñen previsto presentar nos próximos días un escrito ante a Dirección Xeral de Patrimonio Cultural da Xunta de Galicia, reclamando responsabilidades e pedindo que se investigue o posible alcance dos danos. Así mesmo, solicitarán os permisos pertinentes que a Consellería debe conceder para actuacións como cortas, remoción de terras ou repoboacións forestais nas contornas de protección. Lídia Senra e Paula Verao critican a deixadez da Administración e permisividade que adoita ter cos intereses das madeireiras, aínda que sexa a costa de destruír o territorio. Neste sentido, lembran como a destrución de bens patrimoniais e de xacementos arqueolóxicos na provincia de Lugo é unha constante e reclaman unha actuación urxente e contundente contra estas prácticas.
Así mesmo, Lídia Senra ten previsto presentar un escrito na Comisión Europea denunciando a situación que se está a producir en Chavaga. “Este 2018 está a ser o Ano Europeo do Patrimonio Cultural e unha das responsabilidades da UE é velar pola conservación e desenvolvemento do patrimonio cultura europeo. A UE ten que saber que na Galiza, coa complicidade da Administración, se está a destruír día si e día tamén patrimonio galego, e debe actuar para parar isto. É necesario que todas as Administracións afectadas, incluído tamén o Concello de Monforte, actúen para frear estas desfeitas canto antes”, reclamou.
Neste sentido, a europarlamentaria fai un chamamento á reflexión: “Esta semana erguiámonos un día coa noticia de que alguén intentou danar un ben patrimonial como é a catedral de Santiago facendo unha inadmisible pintada na fachada, algo totalmente reprobable. A mesma contundencia de denuncia pública e rexeitamento que tivo este feito debe telo tamén o deterioro que están a provocar nos castros dos montes e no patrimonio arqueolóxico rural a diario as empresas madeireiras. É patrimonio cultural igual de importante e aquí o dano fano empresas coa compliciade das Administracións, o cal aínda é máis grave”, defendeu.
Pola súa banda, Paula Verao tamén presentará varias iniciativas no Parlamento Galego referidas á situación de perigo e deterioro do castro de Chavaga. A deputada autonómica comprobará se a Xunta concedeu os permisos pertinentes e solicitárá á Dirección Xeral de Patrimonio unha valoración do estado do xacemento, dada a afectación dunha posible terraza do castro. “O desleixo da Xunta con respecto aos castros da provincia de Lugo é unha constante, permitindo destrozos por parte da industria da madeira, nunha insostible situación de descoordinación entre as distintas Consellerías da Xunta implicadas, os Concellos, Seprona e as forzas e corpos de seguridade”, afirma.
