- A eurodeputada galega enviou unha carta á nova Comisaria de Dereitos Humanos do Consello de Europa, Dunja Mijatovic
- Represión social, vulneración dos dereitos á liberdade de expresión, información e manifestación, algúns dos aspectos destacados
Bruxelas, 17 de Xullo de 2018. A eurodeputada galega integrada no Grupo Confederal da Esquerda Unitaria Europea/Esquerda Verde Nórdica (GUE/NGL), Lídia Senra, vén de remitir unha carta á nova Comisaria de Dereitos Humanos (DDHH) no Consello de Europa, Dunja Mijatovic, co obxectivo de facerlle chegar a súa preocupación polos numerosos casos de vulneración de dereitos humanos e liberdades producidos no Estado español nestes últimos anos.
Completando a súa comunicación, Senra achegou tamén un dossier entregado xa ao gabinete do anterior Comisario de DDHH do Consello, Nils Muiznieks, nunha xuntanza mantida en Estrasburgo o pasado mes de setembro. A través deste documento a eurodeputada galega proporcionou exemplos concretos acontecidos tanto na Galiza como no Estado, nomeadamente o aumento da represión social, a vulneración do dereito á manifestación e á liberdade de expresión e información, a situación nas prisións, o incumprimento da Lei de Memoria Histórica, a vulneración dos dereitos lingüísticos e dos símbolos da Galiza, a vulneración do dereito á folga ou a denominada Lei Mordaza.
Remitíndose a este primeiro contacto, a eurodeputada alerta na comunicación dirixida agora á Comisaria que “dende entón os casos de serio risco para os dereitos humanos segueron a repetirse”. De feito, como a propia Senra denunciou no seu momento ante a Comisión Europea por medio dunha pregunta parlamentaria, fai unhas semanas a organización internacional independente Freemuse revelou a través do seu informe anual ‘O Estado da liberdade artística 2018’ que o español é o Estado que máis artistas meteu na cadea (13), por diante de China (12) e Irán (9). “O informe, silenciado polos medios de comunicación maioritarios, apunta que se están aproveitando as modificacións introducidas na lexislación antiterrorista no 2014 para atacar expresións artísticas acusándoas de apoloxía ou enaltecemento do terrorismo”, explica Senra a Mijatovic na súa misiva.
Ademais, abondou, “neste clima de vulneración do dereito á libertade de expresión e de información, fai poucos días tivemos coñocemento de que a varias persoas presas no Estado español vetóuselle o acceso ao número 451 da revista La Directa”, medio de comunicación catalán con máis dunha década de historia e depósito legal. “Recibiron una notificación na que se lles informaba de que a prisión decidira reter a publicación por considerar que o seu contido tiña por obxectivo ´a desestabilización do sistema penitenciario´”, explicou Senra, quen precisamente o mes pasado dirixiu unha pregunta á Comisión Europea denunciando esta situación. “É absolutamente intolerábel que se restrinxa o dereito de calquera persoa a recibir un medio de comunicación. Esta reacción penso que exemplifica ben a situación de censura e ataque á liberdade de información que se está a padecer no Estado español, ben lonxe dos valores que a propia Unión Europea di defender”.
Como peche da súa interpelación, a eurodeputada Senra solicitou á Comisaria Mijatovic que teña en conta a información proporcionada e “que faga todo o que teña nas súas mans para que no Estado español tódalas persoas teñamos garantidos os nosos dereitos”. Ademais, subliña a galega, “á vista da situación actual, gustaríame saber cal é a súa impresión en relación ao respecto aos dereitos humanos no Estado español e que medidas pode levar adiante”.
