- Advirte que os fondos europeos teñen sido empregados en moitas ocasións precisamente para desmantelar os tecidos produtivos locais
- Acusa á UE de empregar orzamento público para devastar a articulación económica dos países e preparar o terreo para os grandes capitais
Estrasburgo, 14 de Marzo de 2018. O Parlamento Europeo aprobou hoxe un informe no que avanza as súas primeiras recomendacións para o Marco Financieiro Plurianual (MFP) da UE a aplicar a partir do ano 2020, e un segundo texto no que aborda posíbeis modificacións do actual sistema de obtención de recursos propios. A eurodeputada galega do Grupo Confederal da Esquerda Unitaria Europea/Esquerda Verde Nórdica (GUE/NGL), Lídia Senra, que precisamente a pasada fin de semana coordinou en Santiago de Compostela unha xornada informativa sobre fondos europeos, abstívose na votación destes informes. “Estamos en contra de que se reduzan os orzamentos públicos, xa que son imprescindíbeis para desenvolver políticas públicas fortes. Pero tampouco podemos votar a favor do xeito no que se están a empregar estes cartos. Estamos en contra de cuestións recollidas expresamente no texto, como o aumento do gasto militar e, en xeral, botamos en falta unha reflexión de fondo sobre a orientación do orzamento comunitario”, abondou.
Se ben por exemplo o texto do informe sobre o MFP presentado polo PE critica as carencias do orzamento 2014-2020, e argumenta apostar por un MFP 2021-2027 que defenda valores como a paz e a democracia, “realmente a proposta do PE non vai máis aló do discurso compracente, do que sabe que a sociedade europea quere escoitar, pero non muda a estrutura do marco nin garante cambios de modelo. Na práctica, os grandes intereses económicos seguen prevalecendo por riba dos dereitos humanos e sociais”. Así, os parámetros recollidos nos informes aprobados hoxe implican seguir na lóxica dun crecemento cada vez máis desequilibrado e desigual, que beneficia principalmente aos sectores financeiro e bancario e ás multinacionais, que están incrementando a súa marxe de beneficios á costa dos salarios das traballadoras e traballadores. “A proposta do Parlamento vai na liña de seguir priorizando o capital privado fronte ao capital público para as inversións en infraestruturas ou a prestación de servizos básicos”, criticou Senra.
Durante o debate conxunto sobre o MFP e o sistema de recursos propios da Unión, previo á votación de ámbolos dous informes, Senra tamén lamentou que non se deixaran claras cuestións de fondo. “Hai que aclarar aspectos como que os países chamados “contribuíntes netos” son precisamente os máis beneficiados, e as persoas que tributan neles deberían saber que os seus impostos son empregados en seguir potenciando as multinacionais e reforzando a lóxica capitalista de concentración da riqueza da que é partícipe a UE”.
Lonxe da narrativa ca que se tenta a miúdo presentar á Unión Europea como un proxecto baseado nun mecanismo de solidariedade entre os Estados membro, a eurodeputada galega puxo o foco na conformación da UE como un axente político que fai uso de contrapartidas económicas para favorecer mudanzas que deterioran os tecidos produtivos favorecendo o control dos recursos por parte de grandes capitais. “Como xa vimos por exemplo na década dos ´80 e ´90 na Galiza, os fondos europeos non se destinan a acadar o desenvolvemento dos países da periferia económica europea, senón que son empregados precisamente para desmantelar os seus sectores produtivos, como pasou no noso País coa financiación do cese anticipado das explotacións agrarias, desguace de barcos pesqueiros ou o desmantelamento da industria naval”.
A eurodeputada galega lamentou que, unha vez máis, a UE estea a dar pasos “na dirección contraria dos valores que di defender” e criticou duramente a clara contradición entre discurso e praxe das institucións comunitarias. “Agora que o obxectivo de destruír os sectores produtivos están conqueridos din que xa estamos “desenvolvidos”, que ironía máis indignante sendo como somos tan conscientes de que a nosa mocidade ten que seguir emigrando para poder vivir…”.
