- Xunto a 16 eurodeputadas/os dirixiu unha carta ao vicepresidente da CE notificando a prohibición en Madrid dun acto polo dereito a decidir
- Forma parte tamén das máis de 30 eurodeputadas/os que denunciaron diante a CE as ameazas a 712 alcaldes/as catalás por parte da Fiscalía
Estrasburgo, 17 de Setembro de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), procedeu hoxe a denunciar diante da Comisión Europea (CE) a intromisión da Policía Nacional nunha empresa da Coruña baixo o pretexto de investigar a posibilidade de que estivese a fabricar furnas de metacrilato susceptíbeis de seren empregadas no referendo de Catalunya.
A través do rexistro dunha pregunta parlamentaria -adxunta-, Senra puxo en coñecemento da CE esta actuación policial que cualificou como “un capítulo máis da campaña imposta polo Estado español co fin de estender a política do medo á democracia”. Á vista do endurecemento da estratexia represiva e coercitiva dos dereitos fundamentais despregada esta semana polo Goberno español na súa ofensiva contra o dereito dos pobos a decidir, a eurodeputada galega cuestionou directamente á institución comunitaria se está disposta a actuar para que o Estado deixe de interferir nas actividades empresariais e se garantan e dos traballadores e traballadoras, así como a liberdade de expresión.
Asemade, solicitou saber se a Comisión Europea contempla reaccionar ante a vulneración de dereitos fundamentais que está a protagonizar o Goberno do Partido Popular, a través por exemplo da posta en marcha dun mecanismo preventivo ou incluso sancionador contra o Estado español por estas prácticas seguindo o Artigo 7 do Tratado da Unión Europea, que establece medidas para facer fronte a amenazas sistémicas ao Estado de Dereito nos países da UE.
Reunidas en sesión plenaria en Estrasburgo, ducias de eurodeputadas e eurodeputados estiveron asistindo con preocupación á deriva represiva do Goberno español, que non dubidou en activar durante esta semana mecanismos xudiciais e medios policiais para impedir o dereito de reunión, liberdade de expresión e representación democrática. Lídia Senra, xunto con outras 16 eurodeputadas/os, remitiu onte unha carta ao vicepresidente da Comisión Europea, Frans Timmermans, poñéndoo en coñecemento da suspensión cautelar dun acto polo dereito a decidir previsto para o vindeiro domingo 17 en Madrid, e expresando a súa consternación polo ataque ás liberdades civís no Estado español.
Apenas unhas horas máis tarde, a eurodeputada galega formou parte do grupo de máis de 30 deputadas/os do Parlamento Europeo que asinaron conxuntamente unha pregunta dirixida ao presidente da Comisión Europea, Jean Claude Juncker, para denunciar que o Fiscal Xeral do Estado chamou a declarar a 712 alcaldes/as -un 75% do total de alcaldes de toda Catalunya- por teren manifestado apoiar a realización do referendo do vindeiro 1 de Outubro.
A eurodeputada Lídia Senra acusou ao Goberno español de estar “tecendo unha estratexia coercitiva para espallar o temor entre a cidadanía, para contaxiar un sentimento de vulnerabilidade co que tentar bloquear o dereito das persoas, dos pobos, a decidir democraticamente sobre o seu futuro”.
