- A UE está en proceso de renovación das relacións cos Estados de África, Caribe e Pacífico. A XXXV Asemblea Paritaria finalizou onte en Bruxelas
- Senra, representante do GUE/NGL na UE-ACP dende 2014, reiterou o chamamento a respectar a soberanía dos pobos de ámbalas partes
Bruxelas, 21 de xuño de 2018. A Unión Europea atópase en proceso de renovación do acordo de asociación vixente cos Estados de África, Caribe e Pacífico (ACP), relacións actualmente rexidas polo Acordo de Asociación de Cotonú, que establece que as partes deben retomar as negociacións antes da expiración deste texto en febreiro do 2020.
Dende este luns 18 até o serán de onte tivo lugar en Bruxelas a XXXV Sesión da Asamblea Parlamentaria Paritaria UE-ACP, precedida da xuntanza durante a fin de semana anterior do Foro de Mulleres e das comisións de traballo sobre Asuntos Sociais e Medioambiente; Desenvolvemento Económico, Finanzas e Comercio e a comisión de Asuntos Políticos.
A eurodeputada galega Lídia Senra, integrante da ACP-UE en representación do Grupo Confederal da Esquerda Unitaria Europea/Esquerda Verde Nórdica (GUE/NGL) na Asamblea Parlamentaria Paritaria UE-ACP (APP UE-ACP) dende o ano 2014, subliñou a pertinencia de que este novo escenario de negociación sexa aproveitado para establecer “un renovado marco de relacións entre a UE e os países ACP que remate co espolio neocolonial e poña en primeiro lugar a soberanía dos pobos”.
Así, Senra aproveitou a súa intervención durante o debate mantido en sesión plenaria arredor das claves para loitar contra a xenofobia, o racismo e a discriminación -espazo que contou ca participación de Ingibjorg Solrun Gisladottir, directora da Oficina de Institucións Democráticas e Dereito Humanos (OIDDH) da Organización para a Seguridade e a Cooperación en Europa (OSCE)-, para criticar que a propia Unión Europea, “a través das súas políticas neoliberais e da imposición de relacións políticas e comerciais ao servizo das elites económicas”, está a ser “cómplice dos conflitos e da pobreza extrema que dan lugar ás migracións forzadas en terceiros países”, así como da “precarización e aumento da pobreza nos propios Estados membro”.
Ao fío da súa responsabilidade como coordenadora do GUE/NGL na Comisión de Agricultura e Desenvolvemento Rural do PE -así como responsábel a nivel de todo o PE do seguimento da transversalización da perspectiva de xénero nesta Comisión-, a eurodeputada galega tomou tamén a palabra na discusión sobre os impactos do comercio ilegal dos insumos agrícolas nas economías dos países ACP. “Na UE, grazas á loita do sector apícola, -explicou- por fin asumiuse a necesidade de reducir ao máximo os neonicotinoides debido ao seu impacto nas abellas e outros polinizadores. Agora cómpre estar atentas para que estes produtos non sexan distribuídos nin na UE nin nos países ACP. É fundamental establecer normas estrictas para o emprego de pesticidas, dado que xa sabemos perfectamente os negativos efectos que ten na saúde das persoas, de modo moi destacado no campesiñado e moi especialmente nas mulleres”.
A urxencia de establecer medidas políticas que avancen na garantía do respecto aos dereitos das mulleres en todo o mundo estivo tamén presente durante a sesión plenaria do XXXV Asemblea Parlamentaria Paritaria UE-ACP. Durante o debate sobre parámetros demográficos co Director do Fondo de Poboación das Nacións Unidas (UNFPA), Benoit Kalasa, Senra incidiu nas dúas caras dunha situación que está a afectar as mulleres, manifestando o seu rexeitamento tanto a “unha maternidade imposta nin polas institucións, nin pola Igrexa, nin polo patriarcado” como ao feito de que a maternidade sexa utilizada “como un factor para afondar na fenda laboral e social que discrimina ás mulleres”. Fronte a estes escenarios, a eurodeputada galega reivindicou que “as mulleres temos que ser o centro e as protagonistas neste debate” e animou a adoptar unha óptica feminista para interpretar as estatísticas demográficas, avogando por “avanzar no acceso aos servizos públicos, co-responsabilidade nos coidados e reparto da riqueza para avanzar no equilibrio demográfico, tanto no Norte como no Sur”.
Porén, logo de cinco intensas xornadas de debates arredor dalgúns dos puntos máis relevantes do marco de relacións entre a UE e os países de África, Caribe e Pacífico, a representante do GUE/NGL nesta Asemblea Parlamentaria Paritaria mostrouse crítica co desenvolvemento destas negociacións. “Lamentablemente, a Unión Europea está máis preocupada por consolidar un acordo que perpetúe o espolio dos recursos naturais, dos bancos de pesca, o acaparamento de terras ou dos mercados dos países ACP que por alcanzar un acordo que poña fin ao neocolonialismo, que garanta a estes pobos a súa soberanía e un desenvolvemento sostíbel”.
