• O Parlamento Europeo aprobou unha resolución que insta á Comisión Europea a non comercializar o millo transxénico NK603xT25
• A maioría da poboación comunitaria é contraria aos organismos xeneticamente modificados e non confían neles como alimentos

Estrasburgo, 17 Decembro 2015. Que a Comisión Europea está fortemente influenciada polo lobby pro-transxénico é, lamentabelmente, unha realidade ben coñecida. Non obstante, non deixa de resultar fondamente indignante cando esta institución, que supostamente ten que representar a vontade da poboación comunitaria, despreza a opinión pública europea maioritariamente contraria aos organismos xeneticamente modificados[1].

Onte o Parlamento Europeo (PE) aprobou unha resolución que insta á Comisión Europea a derogar a súa Decisión de Execución (UE) 2015/2279, pola que o pasado 4 de decembro autorizou a “comercialización de produtos que estean compostos de millo modificado xeneticamente NK603 × T25 (MON-ØØ6Ø3-6 × ACS-ZMØØ3-2), que o conteñan ou se teñan producido a partir del”.

Segundo o práctica lexislativa, malia a que non se trata dun procedemento de co-lexislación senón de consulta, a Comisión tiña a obriga de presentar un borrador ao Parlamento para coñecer a súa opinión antes de tomar a decisión de aprobar a comercialización deste millo. Porén, malia a contar xa ca posición contraria da Comisión de Medioambiente do Parlamento Europeo dende o día 1 de decembro, a Comisión non so a obviou, senón que nin tan sequera agardou a coñecer a opinión do Parlamento en sesión plenaria, dando mostra dun ninguneo cara as responsabilidades da Eurocámara totalmente intolerábel, e mesmo non respectando incluso o propio procedemento.

 A eurodeputada de Alternativa Galega de Esquerda en Europa (AGEe), Lídia Senra, acusou á Comisión de estar “tentando eludir o debate dos organismos xeneticamente modificados”, dando unha mostra do forte poder que as multinacionais da industria transxénica opera sobre as institucións europeas.

Aliás, tanto na resolución aprobada onte en sesión plenaria como na aprobada pola Comisión de Medioambiente do PE, sinálaselle á Comisión que o actual sistema de aprobación para os alimentos modificados xeneticamente non está funcionando correctamente[2] e advírteselle que non é coherente ca lexislación da Unión ao ser incompatíbel co propósito dos Regulamentos (CE) 1829/2003 e (CE) 396/20, polo que “resulta realmente indignante que a Comisión non so desoia por completo estas advertencias, senón que ademais estea a optar por oporse frontalmente ás indicacións do Parlamento”.

 “A sociedade europea non queremos os transxénicos, moitas persoas somos conscientes dos efectos negativos dos organismos xeneticamente modificados” -entre os que destacan as afeccións na saúde humana e o deterioro do medioambiente-, “e tamén as labregas e labregos, que padecemos moi de perto a súa ditadura das patentes e a imposición do actual sistema agroindustrial”, reiterou a eurodeputada galega.

Fronte ao acontecido ca autorización deste millo transxénico, Senra esixiu á Comisión Europea “que cumpra dunha vez por todas ca súa función, que é precisamente velar polos intereses xerais da UE comprobando que se cumpre a lexislación comunitaria”, e que deixe de protagonizar “manipulacións da vontade lexislativa da UE tan vergoñentas e perigosas para a poboación como esta”.

[1]Segundo datos do Eurobarómetro especial sobre biotecnoloxía publicado no ano 2010 (Páx.18), o 61% da poboación europea considera que os alimentos modificados xenéticametne faille sentirse “incómoda”. Ademáis, o 61% non está dacordo en que se alente o seu desenvolvemento, o 59% pensa que non é seguro para a súa saúde e a da súa familia e o 58% non os considera alimentos seguros para novas xeracións.

[2]”Failles dans l’homologation de six maïs OGM en Europe”, Le Monde, h ttp://www.lemonde.fr/planete/article/2015/10/14/failles-dans-l-homologation-de-six-mais-ogm-en-europe_4788853_3244.html