- Tamén esixiu pór fin á brecha de xénero e á desigualdade que afecta a quenes traballan na agricultura, no mar e persoas autónomas en xeral
- Apelou á posta en marcha de medidas que garantan que pasar da vida laboral activa á xubilación non signifique entrar na pobreza
Estrasburgo, 13 de setembro de 2018. Durante a sesión plenaria do Parlamento Europeo (PE) que está a ter lugar en Estrasburgo durante esta semana celebrouse, a petición expresa do Grupo da Esquerda Unitaria Europea-Esquerda Verde Nórdica (GUE/NGL), o debate “O futuro das pensións: a loita contra a privatización e o fortalecemento dos sistemas de seguridade social pública universal”.
A eurodeputada galega do GUE/NGL, Lídia Senra, reiterou unha vez máis a esixencia da retirada do Produto de Pensións Individuais (PEPP), unha proposta da Comisión Europea que, como lembrou o grupo parlamentario da propia Senra a través dunha nota de prensa, resposta aos intereses de empresas de investimento global como Black Rock.
Senra, que xunto co eurodeputado portugués Miguel Viegas (GUE/NGL) rexistrou no mes de abril un total de 16 emendas ao texto que se presentou na Comisión de Asuntos Económicos do PE, e que impulsou a participación de 30 activistas galegas/os na xornada “Xubilación en tempos de austeridade. Cal será o futuro do noso sistema de pensións?” celebrada nos mes de xaneiro no PE, apelou novamente no hemiciclo da Eurocámara á responsabilidade das institucións comunitarias. “Ter unha pensión digna non pode depender da capacidade individual de aforro de cada persoa, ten que ser garantida polas institucións públicas, por iso pido ao Parlamento e ao Consello a retirada do Produto Panaeuropeo de Pensións Individuais (PEPP)”.
No canto de facer o xogo aos intereses de entidades financeiras e compañías de seguros e de xestión de activos, retrucou, instou á Comisión, Consello e Parlamento a traballar conxuntamente nun novo regulamento “que garanta sistemas de pensións públicos e pensións públicas dignas, así como medidas que aseguren que pasar da vida laboral activa á xubilación non signifique entrar na pobreza”.
A eurodeputada galega esixiu á UE adoptar unha posición que implique pór fin á desigualdade que se produciría de ir adiante o Produto Panaeuropeo de Pensións Privadas. “Queremos que os orzamentos públicos garantan as pensións públicas, o fin da fenda de xénero nas pensións e tamén a discriminación das persoas que traballan na agricultura, no mar e autónomas en xeral”. “O artigo 25 da Declaración Universal dos Dereitos Humanos di que todos e todas temos dereito a un nivel de vida axeitado, os e as pensionistas tamén. Fagamos que se respecte”, defende.
