- Esta mañá o Parlamento Europeo debateu en sesión plenaria sobre a situación de crise que padece o sector agroalimentario europeo
- AGEe reiterou a necesidade de afastarse das pautas neoliberais avogando polo o establecemento de políticas agrarias públicas
Estrasburgo, 12 Abril 2016. A eurodeputada de Alternativa Galega de Esquerda en Europa, Lídia Senra, aproveitou na mañá de hoxe a súa quenda de intervención no debate sobre a crise agraria en sesión plenaria do Parlamento Europeo, para instar á Comisión Europea a “abandonar propostas inmobilistas repetidas durante os últimos trinta anos e que nos levaron á situación de crise onde estamos agora”.
A actual crise agraria na Unión Europea “pon de manifesto o fracaso dunha PAC feita á medida das directrices neoliberais”, analizou Senra. E, para facerlle fronte, resulta imprescindíbel o establecemento de políticas públicas “que partan da regulación da produción e da priorización dos mercados internos, garantindo que a produción alimentar estea en mans de labregas e labregos”.
A eurodeputada galega defendeu na Eurocámara a necesidade de políticas públicas “que fagan un reparto xusto do dereito a producir e que sitúen os prezos dos produtos agrícolas no centro da Política Agraria Común, so así daremos resposta a esta crise”. Outro tipo de posicionamentos, advertiu, “son propostas inmobilistas que só nos levan a afondar a situación de crise que temos”.
Intervención da eurodeputada de AGEe Lídia Senra en sesión plenaria.
