- Lídia Senra insta aos presidentes da Comisión e do Consello Europeos a deixar de actuar como “títeres das multinacionais”
- Rexistra unha intervención por escrito no Parlamento Europeo pedindo que deixen de presionar a Valonia e asuman a soberanía dos pobos
Estrasburgo, 26 outubro 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), rexistrou hoxe no Parlamento Europeo unha declaración por escrito na que lle esixe ao presidente da Comisión Europea e ao presidente do Consello Europeo, os señores Jean-Claude Juncker e Donald Tusk, respectivamente, que non sigan prolongando innecesariamente as negociacións sobre o CETA (Acordo Económico e de Comercio Global da UE con Canadá), e que escoiten á poboación e as dean xa por fallidas e finiquitadas.
Despois do debate que tivo lugar esta mañá no pleno da Eurocámara en Estrasburgo, sobre “Conclusións da reunión do Consello Europeo dos días 20 e 21 de outubro do 2o16”, Lídia Senra decidiu presentar unha declaración na que dirixíndose a Juncker e a Tusk defende que o rexeitamento que a cidadanía europea e o Parlamento de Valonia manteñen cara ao CETA non é máis que unha sinal de que a poboación e algunhas institucións “están asumindo as responsabilidades que lle corresponderían a vostedes: Defender a democracia e a soberanía dos pobos fronte aos intereses e ao poder das multinacionais”.
Fronte á insistencia por parte de Juncker e de Tusk de seguir intentando desbloquear a sinatura do CETA que estaba prevista inicialmente para mañá xoves, Lídia Senra ínstaos a “ter en conta que a cidadanía non quere este acordo de nova xeración que converte aos Gobernos e aos Parlamentos que nós escollemos en marionetas das multinacionais”.
“Non queremos un acordo que hipoteca o noso futuro, que elimina o principio de precaución e que converte dereitos recollidos na Declaración Universal de Dereitos Humanos como son a Saúde e a Educación en mercadoría accesible soamente para quen poida pagar eses servizos”, recolle a declaración por escrito de Senra. “Non prolonguen innecesariamente máis isto. Escoiten á poboación, deixen de presionar a gobernos como o de Valonia –que votou contra o acordo- que responden aos intereses da poboación. Poñan fin ás negociacións do CETA xa”, conclúe a eurodeputada galega.
