Comunicado de prensa emitido en nome do Grupo de Amizade co País Vasco no Parlamento Europeo, do que Alternativa Galega de Esquerda en Europa (AGEe) forma parte a través da súa eurodeputada Lídia Senra, en relación á liberación de Arnaldo Otegi.
Grupo de Amizade co País Vasco no Parlamento Europeo
Liberación de Arnaldo Otegi
04 Marzo 2016
O 13 de outubro do 2009 Arnaldo Otegi foi detido xunto con catro compañeiros/as mentres preparaba unha nova iniciativa pola paz. Policías militares españois irromperon na sede do sindicato vasco LAB en Donostia, onde Otegi e varios membros da dirección do partido estaban preparando o proceso de debate da súa nova proposta de paz.
A pesar destes encarceramentos, a proposta foi difundida e comezou a circular amplamente no movemento. Desde novembro de 2009, a proposta foi discutida en reunións por case 10.000 activistas, que acordaron cal sería o novo camiño a seguir. O núcleo desta estratexia é a aposta unilateral de empregar medios exclusivamente pacíficos, para de xeito pacífico lograr o apoio internacional e da cidadanía vasca, instando a todas as partes implicadas no conflito a aceptar a vontade democrática do pobo vasco e pór fin á violencia. A nova estratexia aprobou os chamados Principios Mitchell, promovidos polo senador e diplomático estadounidense George Mitchell durante o proceso de paz irlandés.
A fin de denunciar esta situación e solidarizarse con Arnaldo Otegi, foi emitida no ano 2015 en Bruxelas a a declaración internacional Liberdade para Otegi. Traer os presos políticos vascos a casa. Desde entón, moitos persoeiros/as de todo o mundo sumáronse a esta declaración a favor da liberación do líder independentista e o achegamento das persoas presas políticas vascas, nomeadamente o Premio Nobel da Paz Desmond Tutu; Adolfo Pérez Esquivel e Mairead Maguire; o expresidente de Uruguai, José Mugica; o ex alcalde de Londres, Ken Livingstone; intelectuais como Angela Davis, Noam Chomsky e Slavoj Zizek; 27 deputados e deputadas do Parlamento Europeo; representantes irlandeses dos eidos da política, cultura, deporte, xornalistas e académicos; representantes do eido da política e da cultura de Catalunya; creadores/as culturais vascos/as, entre outros/as.
Ademais, o ex-eurodeputado e membro do BFG François Alfonsi participou no xuízo a Arnaldo Otegi no 2011 e denunciou entón a persecución da actividade política, especialmente aquela exercida sobre as actividades e traballo de Arnaldo Otegi a prol da paz e a reconciliación.
Nós, como un Grupo de Amizade para promover a resolución do conflito en Euskadi, consideramos que Arnaldo Otegi non debería ter sido detido, xa que a súa contribución ao novo escenario foi crucial. Nós consideramos totalmente inxusto e arbitrario que fora privado de liberdade por seis anos. Agardamos que a contribución de Arnaldo Otegi sexa útil para o proceso de paz en Euskadi, para poder avanzar e superar o bloqueo actual mantido polos Gobernos español e francés.
