- As conclusións presentaranse mañá, martes 26, no marco do X aniversario do Grupo de Amizade co País Vasco do Europarlamento
- Contará ca presenza de Arnaldo Otegi, quen impulsará dende o Parlamento o relanzamento do manifesto internacional “Free them all”
Bruxelas, 25 Abril 2016. Mañá, martes 26 de abril, a eurodeputada de Alternativa Galega de Esquerda en Europa, Lídia Senra, participará na presentación das conclusións dun informe sobre dereitos humanos realizado no País Vasco. Dito documento foi elaborado a partir das informacións e testemuñas obtidas por unha delegación[1] do Parlamento Europeo integrada por sete eurodeputadas/os pertencentes a tres grupos políticos distintos[2] -entre as que se atopaba a propia Lídia Senra-, que se desprazaron a Euskal Herria no mes de febreiro.
Durante dous días, as eurodeputadas/os mantiveron máis de vinte xuntanzas, abarcando dende o Parlamento Vasco e Navarro até organizacións de apoio legal e médico ás persoas presas políticas vascas, pasando polo Colexio de Avogadas/os de Bizkaia, representantes dos medios de comunicación e sindicatos, e desprazándose tamén ao País Vasco francés (Iparralde).
Esta toma de contacto ca realidade en materia de políticas petinenciarias foi unha experiencia “que nos deixou realmente impactadas e fondamente preocupadas, xa que apreciamos un estancamento da situación que non está a facer máis que prolongar o sufrimento de tódalas partes”. Foron dous días de intenso traballo “moi cargados de emocións, nas que tivemos a oportunidade de coñecer de primeira man distintas información sobre a actual situación das persoas presas políticas vascas”, valorou a eurodeputada galega.
Ademais das conclusións e recomendacións, este informe incorporará unha análise xurídica sobre aspectos como a dispersión, a acumulación de condenas e a relación que os Estados español e francés están a manter cos presos e presas políticas vascas gravemente enfermas.
Free Otegi, Free them all
Ao fío da presentación deste informe no marco do X Aniversario do Grupo de Amizade do Parlamento Europeo co País Vasco[3], o dirixente da esquerda abertzale Arnaldo Otegi relanzará a declaración internacional Freedom for Arnaldo Otegi. Bring Basque Prisoners Home[4], que fai fincapé, entre outros aspectos, en rematar ca política estatal de dispersión de presos/as, unha medida imposta polo Estado cuxas consecuencias afectan principalmente a familiares e amizades[5].
[1]Ver [NdP120216AGEe] Lídia Senra participará nunha delegación do PE a Euskal Herria para obter información sobre DDHH e [NdP280116AGEe] Delegación do Parlamento Europeo ao País Vasco. Dereitos Humanos.
[2]A Presidenta do Grupo da Esquerda Verde Nórdica-Esquerda Unitaria Europea (GUE/NGL), Gabi Zimmer (Die Linke); o Vicepresidente do Grupo Verdes/Alianza Libre Europea (Verdes-ALE), Josep-Maria Terricabras (Esquerra Republicana de Catalunya, ERC); e as eurodeputadas/os Lídia Serna (Alternativa Galega de Esquerda en Europa), Martina Anderson (Sinn Féin), Malin Björk (Vänsterpartiet), Tatjana Ždanoka (Latvijas Krievu Savienība) e Mark Demesmaeker (Nieuw-Vlaamse Alliantie, N-VA).
[3] Adxuntamos cartaz X Aniversario.
[4] A eurodeputada de AGEe participou tamén como integrante do Grupo de Amizade co País Vasco no lanzamento da campaña Free Otegi. Free them all que tivo lugar no Parlamento Europeo o 24 de marzal do ano 2015 e contou ca presenza do músico Fermín Muguruza.
[5]Senra tivo tamén a oportunidade de afondar máis nesta realidade entrevistándose cunha delegación da organización de amizades e familiares[5] de presas e presos vascos Etxerat o ano pasado no Parlamento Europeo: http://www.naiz.eus/hemeroteca/gara/editions/gara_2015-03-04-06-00/hemeroteca_articles/etxerat-cosecha-apoyos-a-su-causa-en-la-eurocamara-incluso-en-el-ppe
