- Lídia Senra insta a Jean-Claude Juncker para “poñer fin á ditadura do euro, da débeda e das políticas de axuste e austeridade”
- A eurodeputada de AGEe sácalle tarxeta azul a González Pons no pleno do Parlamento Europeo en Estrasburgo polos novos recortes anunciados polo Goberno Español
Santiago, 14 setembro 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), asistiu este mércores no pleno do Parlamento Europeo, en Estrasburgo, ao debate anual sobre o Estado da Unión, no que o presidente da Comisión Europea, Jean-Claude Juncker, realizou un discurso “cheo de demagoxia e propaganda” sobre as supostas “vondades” dunha Unión Europea que, a xuízo de Senra, “fai auga por todas partes, pero non queren ver”. A eurodeputada galega dedidiu facer uso do dereito a intervención escrita que posúe e rexistrou un escrito na Eurocámara para deixar constancia da súa posición.
“Estamos fartas e fartos. Europa non se constrúe con propaganda, nin con demagoxia nin con represión. Europa constrúese poñendo fin ás políticas de axuste e aos recortes, non ameazando con retirar os fondos. Constrúese facendo que a débeda a paguen os responsables de contraela, é dicir, os bancos e as grandes empresas”, defende Lídia Senra, quen acusa a Juncker de “vender a protección do estilo de vida europeo” mentres o ministro español de Economía, Luis de Guindos, anunciou esta mesma semana “un Decreto sobre novos recortes para cumprir con Europa”, en referencia ás políticas de austeridade coas que o goberno do PP do Estado español pensa seguir para cumprir cos compromisos e co pacto de estabilidade no marco da UE.
“A UE ameaza: Ou recortes ou conxelación de fondos. Supoño que ese é o modo de vida europeo que defende o señor Juncker, políticas para que as grandes corporacións sigan facendo negocio á costa dos bens públicos e da suor das e dos traballadores e co sufrimento das clases populares”, denuncia Lídia Senra. A eurodeputada galega asegura que os recortes van significar “máis destrución de emprego, máis precarización, máis pobreza, máis carga impositiva para as capas máis desfavorecidas se finalmente soben o IVE aos produtos que hoxe teñen un tipo de IVE reducido como os alimentos”. Neste sentido, Senra dixo que “concordamos en que precisamos unha Europa mellor, pero para iso é necesario derrubar esta UE das grandes empresas”.
Durante o debate de hoxe no pleno do Parlamento Europeo, Lídia Senra ademais sacoulle tarxeta azul ao vicepresidente do grupo do Partido Popular Europeo (PPE), Esteban González Pons, para interpelalo sobre se non considera que os recortes anunciados polo goberno do estado español para cumprir coas esixencias da UE van perxudicar ás clases máis desfavorecidas. Na súa contestación, González Pons xustificou os recortes que se levarán a cabo e respostoulle a Senra que “España é un bo socio e polo tanto ten que cumprir coa UE”.
A eurodeputada de AGEe chamou a poñer en marcha medidas que poñan fin á “ditadura do euro” e políticas activas para crear emprego, erradicar a pobreza e a exclusión social, regularizar a produción e os mercados,… “Os fondos europeos teñen que ir non para destruír barcos, por exemplo, senón para facer un reparto xusto do dereito a pescar, algo do que o presidente Juncker nada falou hoxe”, denunciou Lídia Senra, quen defendeu tamén que a mocidade galega merece “traballo digno, non ter que converterse en exiliados e exiliadas económicos”. “Merecen ter servizos públicos de calidade e gratuitos e non ter que abandonar os estudos porque as familias non os poden pagar”, engadiu.
Igualmente, Senra tamén fixo mención aos sectores produtivos básicos. “O sector lácteo non precisa esmola, precisa regulación”, zanxou.
