- O evento abordará o tratamento médico das mulleres, a vacina do papiloma humano e a violencia obstétrica a través de varios coloquios ao longo do día
- Lídia Senra reclama poñer fin á discriminación de xénero no campo médico e da investigación e visibilizar e denunciar estas situacións
Vigo, 05 de decembro de 2018. O Salón de Actos do Museo de Arte Contemporáneo (MARCO) de Vigo acollerá o 15 de decembro unha xornada aberta a todas as persoas interesadas para abordar o tratamento médico das mulleres, a violencia que se dá neste eido, e a discriminación de xénero no campo médico e da investigación. Baixo o título “Mulleres e Saúde”, a xornada, organizada pola eurodeputada galega Lídia Senra, reunirá na cidade olívica a expertas na materia, que protagonizarán varios coloquios e debates durante todo o día.
Senra anima a todas as mulleres a acudir á cita (a entrada será libre até completar o aforo) ante a necesidade de sacar á luz e debater sobre como nos trata o sistema sanitario ás mulleres e denunciar todas aquelas eivas e abusos que se poidan estar cometendo. “A diario vemos como as necesidades das mulleres no campo da investigación non son tidas en consideración, e mesmo como as doenzas que nos afectan contan con menor investimento que as tradicionalmente masculinas e como moitas veces non son tratadas axeitadamente ou son ignoradas”, denuncia a eurodeputada, que tamén ve fundamental poñer os intereses das persoas por riba dos das grandes multinacionais farmacéuticas para garantir a saúde sempre.
O evento comezará ás 11:00 horas, coa apertura do mesmo a cargo da propia Lídia Senra. A continuación desenvolverase un coloquio titulado “O tratamento médico das mulleres” no que participará a presidenta da Asociación Galega para a Defensa da Sanidade Pública, María Luisa Lores, que ten estudada a medicalización e a calidade de vida das mulleres galegas; e Carmiña Mosqueira, que traballou como epidemióloga da Consellería de Sanidade de Asturias e actualmente está xubilada e ten estudado o cribado de cancro de mama por mamografía. A médica Inés López encargarase de moderar o debate.
A partir das 13:00 horas, está previsto que se desenvolva unha charla de Alicia Capilla, presidenta da Asociación de Afectadas pola Vacina do Papilima Humano (AAVP), para explicar as consecuencias que ten tido esta vacina e o traballo que está a desenvolver este colectivo. A activista da Marcha Mundial das Mulleres María Montenegro, encargarase de presentala e moderar o debate.
Xa pola tarde, será a quenda para tratar, a partir das 17:00 horas, sobre “A violencia obstétrica, unha realidade que hai que sacar á luz para tecer sororidade”. No coloquio estarán Elena Gil Rodríguez, experta na situación actual de atención ao embarazo, parto e saúde das mulleres, co-coordinadora galega de O Parto é Noso e responsable do grupo de Vigo; e Iria Pinheiro, nai, actriz e protagonista de ‘Anatomía dunha serea’ de Chévere Berberecheira. A xinecóloga Isabel Blanco será a moderadora.
