- Senra faise eco das investigacións dun medio de comunicación galego que revelan o financiamento público da demanda de Edgewater
- A eurodeputada mantivo contactos ca Comisaria de Comercio, Cecilia Malström, para alertar das posíbeis represalias da mineira canadense
Bruxelas, 15 de Febreiro de 2018. O medio de comunicación galego Praza Pública vén informando nestes días que o Goberno da Xunta de Galicia desviou arredor de 400.000 euros de fondos destinados a investigación, desenvolvemento e innovación (I+D+I) para financiar a demanda interposta pola empresa mineira Edgewater contra o Estado español pola paralización da explotación que Xunta e empresa pretendían chantar en Corcoesto. Este movemento vense a sumar ás cantidades xa desviadas a tal efecto nos últimos anos, como os 150.000 euros de parte do orzamento destinado a axudas para pagar a luz no ano 2016. Segundo revelan as investigacións deste medio de comunicación, arestora o custo para o erario público galego cífrase, polo menos, en máis de medio millón de euros.
“Nos negocios entre empresas e Gobernos no marco do capitalismo neoliberal, os pobos sempre perden”, advertiu a eurodeputada galega Lídia Senra. “As regras de xogo están feitas á medida dos grandes capitais e da connivencia gobernamental: se a mina de Corcoesto chega a ir adiante a poboación sería a máxima perxudicada. Como a mobilización cidadá logrou parala, agora a empresa quere cobrarse os beneficios a costa dos cartos públicos que os propios gobernos galego e español desvían a tal efecto.”
Dende o ano 2014 a eurodeputada galega do Grupo Confederal da Esquerda Unitaria Europea-Esquerda Verde Nórdica (GUE/NGL) leva alertando á Comisión Europea das represalias económicas que a empresa canadense Edgewater pretendía levar adiante contra o pobo galego polo seu éxito na defensa de Corcoesto.
En decembro dese ano, á vista da demanda anunciada pola mineira logo da paralización da explotación aurífera, e no marco do proceso de ratificación do Acordo Económico e Comercial Global entre a UE e Canadá (AECG; CETA, polas súas siglas en inglés) activo nese momento, a Comisaria de Comercio Cecilia Malmström respostou a unha pregunta realizada por Senra no mes de outubro sobre as posíbeis consecuencias deste marco lexislativo, argumentando que a lexislación medioambiental dos Estados membro deberían estar por riba de cuestións económicas vinculadas ao CETA.
Cando no ano 2015 Edgewater interpuxo unha denuncia contra o Estado español -vía a filial creada ad hoc en Panamá e no marco dun acordo de liberalización comercial asinado na década dos noventa entre ámbolos dous gobernos-, Senra dirixiu unha segunda pregunta á Comisaria para informala desta nova situación e consultando a posibilidade de que a Comisión puxera en marcha medidas específicas. Malmström indicou entón que debería ser o Estado español quen actuase como parte demandada.
“A Xunta ten que rematar coa irresponsabilidade de conceder concesións ás multinacionais para explotacións mineiras ou de outro tipo que a cidadanía non quere porque, como no caso da minería, afectan á saúde, ao medio, á auga… e destrúen máis empregos dos que crean. Do contrario entenderemos que o Sr. Feijoo e o Partido Popular están dispostos a seguir beneficiando ás multinacionais a costa de seguir reducindo os orzamentos. Non podemos consentir que sigan hipotecando o noso futuro”, criticou Senra. “Ademais esiximos ao Goberno español que deixe de vender fume sobre as supostas vantaxes dos acordos, que poña fin ao secretismo co que a Comisión Europea está negociando, que informe e que abra un debate sobre todos os acordos que se están negociando e sobre as súas consecuencias reais”.
