Lídia Senra, Xabier P. Davila e Victoria Portas presentan o sábado en Ribadeo o libro ‘O futuro das pensións’

• O acto será ás 18:00h, no Cine-Teatro, organizado por MODEPEN, o Sindicato Labrego Galego e o Movemento en Defensa da Pensión Pública Ribadeo

• A eurodeputada acusa á CE de estar a converterse nun mero xestor dos intereses das grandes corporacións privadas e da especulación capitalista

Santiago, 07 de marzo de 2019. A eurodeputada galega Lídia Senra, o economista e escritor Xabier Pérez Davila e a membro da Coordinadora Estatal en Defensa do Sistema Público de Pensións e do Movemento Galego pola Defensa das Pensións Públicas (MODEPEN) Victoria Portas, presentarán este sábado, 9 de marzo, ás 18:00 horas, no Cine-Teatro de Ribadeo (Rúa de Carlos III, 21), o libro ‘O futuro das pensións. Galiza, Estado español e Europa’¹. Será nun acto aberto a todos os públicos, organizado polo propio MODEPEN, o Sindicato Labrego Galego (SLG) e o Movemento en Defensa da Pensión Pública Ribadeo.

A eurodeputada aproveitará para explicar a proposta de Regulamento para a creación dun Produto Paneuropeo de Pensións Individuais (PEPP), que se está a tramitar nas institucións europeas e que suporía un grave retroceso para o futuro das clases traballadoras, pois implicaría que as pensións de xubilación pasarían a depender da capacidade de aforro de cada persoa. “O PEPP é un paso máis no abandono por parte das Administracions das políticas públicas e de instrumentos básicos para a necesaria redistribución da riqueza que entre todas e todos xeramos na sociedade. É un exemplo máis de como os gobernos e as institucións públicas se están convertendo cada vez máis en meros xestores dos intereses das grandes corporacións, da especulación capitalista, favorecendo a concentración da riqueza en moi poucas mans”, denuncia Senra, que seguirá dando a batalla para que este PEPP non saia adiante no Parlamento Europeo.

O libro, que se repartirá de forma gratuíta entre todas as persoas que asistan ao acto, recolle textos dunha quincena de expertos e expertas en seguridade social, materia laboral e xubilación e pensións de diferentes partes do Estado español e doutros países da UE, que participaron no pasado mes de setembro nunha xornada organizada pola propia Lídia Senra en Santiago de Compostela sobre esta cuestión².