- Insta á CE a posicionarse sobre o desfasado delito de ofensa á relixión que se contempla no aconfesional Estado español e pide que se retire
- A eurodeputada arremete contra o rexurdir de axentes reaccionarios que pretenden acabar cos dereitos fundamentais e incluso co humor
Santiago, 22 de outubro de 2018. A eurodeputada galega Lídia Senra presentou este luns un escrito dirixido á Comisión Europea (CE) no que lle informa sobre o novo capítulo producido na Galiza con respecto ao intento de coartar o dereito fundamental á liberdade de expresión. Mediante unha pregunta parlamentaria[1], Senra fai chegar a Bruxelas o que ela considera “un novo e surrealista ataque propio do Tribunal da Inquisición da Idade Media e da caza de bruxas e de bruxos” na nosa terra. Refírese á admisión a trámite da querela presentada pola Asociación Española de Abogados Cristianos por presuntos delitos de inxurias, incitación á discriminación e contra os sentimentos relixiosos atribuidos supostamente ao coñecido humorista Carlos Santiago polo pregón que ofreceu na capital galega en febreiro para dar inicio ás festas do Antroido parodiando ao Apóstolo Santiago[2].
“Tendo en conta ademais que o español é un Estado aconfesional, non considera a Comisión que un monólogo de humor contratado para as festas de Entroido dun Concello, como é o caso, forma parte do dereito fundamental á liberdade de expresión recollido na Carta dos Dereitos Fundamentais da UE?”, pregunta Lídia Senra no seu escrito rexistrado hoxe. A eurodeputada tamén quere saber se a CE ten algún tipo de constancia das actividades que desenvolve a Asociación Española de Abogados Cristiáns e que opinión ten a Comisión ao respecto de que en pleno século XXI siga habendo algúns países que recoñecen o delito de ofensas á relixión e incluso da blasfemia[3].
Para Senra, o grave destas situacións, é que os tribunais dean amparo a denuncias deste tipo e que os recursos públicos se invistan en investigar xudicialmente cuestións como esta, dando pulo ao rexurdir de axentes reaccionarios que o que pretenden é amedrentar a todo o que se mova, rematar cos dereitos fundamentais das persoas, coa liberdade de expresión, co humor, coas festas e coas tradicións dos pobos. A deputada en Europa amosa todo o seu apoio a Carlos Santiago e ao Concello de Santiago e agarda que o proceso xudicial non vai a máis.
Hai unhas semanas, a europarlamentaria denunciou tamén ante a Comisión Europea o proceso aberto contra o actor Willy Toledo tamén por suposta ofensa aos sentimentos relixiosos por cagarse en Deus a través dun comentario no seu twitter[4]. Polo momento, a CE aínda non deu resposta a aquel escrito. “
______________________
[1] Aquí a pregunta rexistrada hoxe na Comisión Europea sobre o caso de Carlos Santiago:
[2] Admiten a trámite a querela contra o autor do pregón do Entroido de Santiago:
[3] O Estado español, inclúido na minoritaria lista de países nos que ofender ás persoas crentes é delito:
[4] Aquí a pregunta rexsitrada en setembro por Lídia Senra sobre o caso de Willy Toledo:
