- Hoxe debateuse a proposta de creación dunha alianza europea para previr e desincentivar o traballo non declarado nos Estados membro
- Dende AGEe reivindicamos establecer un salario mínimo europeo e a renda básica para garantir os dereitos laborais, sociais e humanos
Estrasburgo, 02 Febreiro 2016. Na mañá de hoxe procedeuse ao debate da proposta de decisión do Parlamento Europeo e do Consello relativa á creación dunha plataforma europea para reforzar a cooperación en materia de prevención e desincentivación do traballo non declarado.
Dende Alternativa Galega de Esquerda en Europa (AGEe) concordamos en que o traballo debe ser “todo declarado e con dereitos”, “mais a loita contra o traballo non declarado non debe penalizar ás traballadoras e traballadores atrapados nel, unha situación que afecta ademais de xeito moi relevante ás mulleres e persoas migrantes”, sinalou a eurodeputada Lídia Senra.
O obxectivo principal das medidas europeas neste sentido ten que ser dignificar o traballo, garantir que todas as traballadoras e traballadores teñamos dereitos sociais e laborais, así como salarios dignos. Por iso, ademais de desincentivar o traballo non declarado, “é necesario eliminar as reformas laborais que quitan dereitos, precarizan ás persoas e consagran a cada vez máis habitual figura das traballadoras e traballadores pobres”. Tamén para avanzar neste eido, resulta fundamental “oporse á converxencia regulatoria explicitada en tratados coma o TTIP, xa que os EEUU non ratificaron moitas das convencións da Organización Internacional do Traballo (OIT) si asumidas pola UE”.
Tamén resulta significativamente alarmante os numerosos casos de “falsos autónomos” como consecuencia da precarización que conleva a práctica das subcontratas. “Estamos falando en moitas ocasións de antiguos traballadores e traballadoras de empresas que son obrigados a converterse en autónomos para poder seguir traballando, pero nunhas condicións de enorme precariedade”, ilustrou Senra.
Aliás, predicións de futuro no eido laboral global como as realizadas recentemente polo Foro de Davos, nas que se contempla a desaparición de alomenos 5 millóns de postos de traballo, debuxan un escenario no que “as medidas que realmente precisan con urxencia as traballadoras e traballadores para que sexan respectados, xa non só os dereitos laborais, senón tamén os sociais e humanos, son o establecemento dun salario mínimo europeo e o garantemento da Renda Básica Universal”, defendeu a eurodeputada galega.
Imaxe: Davila
