- A eurodeputada carga contra a hipocresía do neoliberalismo, que recorta orzamentos nos servizos para as maiorías sociais e aumenta o gasto militar
- A UE calcula que no 2030 as pensións privadas, co Produto Paneuropeo de Pensións Individuais, moverían 2,1 billóns de euros, fronte aos 0,7 de hoxe
Santiago, 28 de setembro de 2018. “Temos a obriga de loitar con uñas e dentes para non deixar ás xeracións que veñen despois, un futuro peor que o que temos hoxe”, defendeu este venres pola mañá en Santiago a eurodeputada galega Lídia Senra, membro do Grupo Confederal da Esquerda Esquerda Unitaria Europea/Esquerda Verde Nórdica, durante a inauguración das xornadas “O futuro das pensións. Galiza, Estado español e Europa”, que se están a desenvolver no Palacio de Congresos, organizadas pola propia Senra en colaboración co Movemento Galego pola Defensa das Pensións Públicas (MODEPEN). Ao longo de todo o día de hoxe e até o sábado a mediodía, as xornadas congregarán a expertos e expertas chegados non só da Galiza, senón tamén do resto do Estado español, Irlanda, Portugal, Suecia, Finlandia, Grecia e Francia, para abordar a situación que están a atravesar os sistemas públicos de pensións nos diferentes países e artellar posibles vías de traballo en común para defendelos.
A eurodeputada arremeteu duramente na súa intervención contra a construción neoliberal da Unión Europea (UE), que se construíu e sigue a desenvolverse en contra dos dereitos das xubiladas e xubilados, a pesar de que o artigo 25 da Carta dos Dereitos Fundamentais di que a UE respectará o dereito das persoas maiores a levar unha vida digna e independente. A xuízo de Senra, este artigo non se está a cumprir, máxime tendo en conta que se está a impulsar desde a Comisión Europea e o Parlamento Europeo e o Consello Europeo o chamado Produto Paneuropeo de Pensións Individuais (PEPP), para alentar aínda máis o mercado privado das pensións en detrimento dos sistemas públicos.
“Estamos vendo que o que realmente lle preocupa á Comisión Europea (CE) e ás maiorías do Parlamento Europeo é que se dea un escenario no que as pensións públicas poidan reforzarse e que ese mercado privado de apoio á banca e aseguradoras que pretenden impulsar se vexa mermado. Segundo os seus cálculos agora mesmo as pensións privadas moven 0,7 billóns de euros e de aprobarse o PEPP moverían 2,1 billóns de euros de aquí ao 2030”, denunciou Senra.
“Non podemos permitir que ningunha persoa cando acaba a súa vida laboral pase á pobreza. Temos que dar a batalla nas rúas, nas institucións e onde sexa necesario”, defendeu a europarlamentaria, para asegurar que seguirá levando esta voz ao Parlamento Europeo e facendo todo o que sexa posible para mudar a situación actual. Neste sentido, criticou a “hipocresía extrema” que teñen as institucións europeas, “porque están dicíndonos continuamente que hai que reducir os orzamentos dos servizos públicos mentres a realidade é que a UE no Marco Financeiro Plurianual previsto para o 2021-2027 pretende priorizar a defensa, sacar diñeiro público dos servizos públicos básicos para investilo no avance do militarismo. De aquí a dentro de 10 anos prevese que se destinen 100.000 millóns de euros para o gasto militar de forma directa e máis investimento de forma indirecta a través doutros programas como por exemplo o Mecanismo Conectar Europa”.
“Son cuestións que non podemos tolerar. Debemos estar moi activas e activos para cambiar esta UE que o único que fai é avanzar en implantar gobernos autoritarios para combatir a mobilización social. Exixiremos que cambien estas políticas para actuar a favor das maiorías sociais, das persoas”, concluiu Senra.
A xornada “O futuro das pensións. Galiza, Estado español e Europa”, as xornadas, que están abertas a todas aquelas persoas que queiran asistir, sen necesidades de inscrición previa e de xeito gratuíto, estruturaranse en diferentes coloquios e debates. Na mañá do venres están intervindo Dimítris Stratoúlis, ex vice-ministro da Seguridade Social e membro do Secretariado Político de Unidade Popular de Grecia; María Isabel Lemos, membro da Direcção Nacional da Inter-Reformados/Confederação Geral dos Trabalhadores Portuguesses-Intersindical Nacional (CGTP-IN); e John Brady, deputado no Parlamento de Irlanda polo Sinn Féin. Así como Victoria Portas, portavoz da Coordinadora Estatal pola Defensa do Sistema Público de Pensións e integrante de MODEPEN; Xabier Pérez Davila, economista, escritor e membro de MODEPEN; e o doutor en Dereito, inspector de Traballo e Seguridade Social e profesor na Universidade de Valencia Héctor Illueca, xunto con Ramón Franquesa, profesor de Economía na Universidade de Barcelona.
Xa pola tarde, ás 16:00 horas, haberá un coloquio para abordar experiencias noutros países europeos, con Christophe Janot, secretario federal da Federación Nacional de Industrias Químicas de Francia (FNIC); Birgitta Sevejford, antiga alcaldesa do Consello do Condado de Estocolmo; e Henri Purje, asesor de política económica do grupo da Alianza de Esquerda no Parlamento de Finlandia.
E o sábado, haberá ás 9:30 horas un relatorio de Carolina Gala Durán, profesora de Dereito do Traballo e da Seguridad Social da Universidade Autónoma de Barcelona sobre “Muller, pensións e atención ás persoas dependentes”, que será introducida por Miguel Arenas, avogado laboralista, profesor colaborador na Universitat Oberta de Catalunya. E a continuación, a partir das 10:45 horas, terá lugar unha charla sobre “Reparto ou capitalización”, con Miren Etxezarreta, economista, profesora da Universidade Autónoma de Barcelona.
A partir das 12:30 horas, presentaranse as conclusións da xornada e alternativas sobre os seguintes temas: Muller, pensións e dependencia; Reparto e capitalización; As Pensións na Galiza; As reformas de 2011 e 2013; e o Produto Paneuropeo de Pensións Individuais (PEPP).
Na xornada tamén participan a deputada de En Marea no Parlamento Galego Paula Vázquez Verao e a concelleira de Políticas Sociais de Santiago, Concha Fernández. O portavoz parlamentario de En Marea, Luís Villares, tamén estivo a primeira hora do evento acompañando e seguindo e tomando nota das intervencións.
