- A eurodeputada galega tomou a palabra no pleno da Eurocámara para esixir que se combata a orixe dos escándalos alimentarios
- Pide tamén o desenvolvemento de regras específicas da UE que garantan a continuidade dos produtos caseiros e dos mercados locais
Estrasburgo, 15 de marzo de 2017. A eurodeputada galega Lídia Senra, integrada Grupo Confederal da Esquerda Unitaria Europea/Esquerda Verde Nórdica (GUE/NGL), tomou a palabra no pleno do Parlamento Europeo desta semana, en Estrasburgo, para reclamar o reforzo de controis que eviten que pragas como a coñecida couza guatemalteca da pataca, que tanto está a afectar nas terras galegas, siga entrando no territorio da UE e se siga estendendo polos nosos países. Senra puxo sobre a mesa esta demanda durante o debate en Estrasburgo sobre “Lexislación sobre alimentos e pensos, normas sobre saúde e benestar dos animais, sanidade vexetal e produtos fitosanitarios”.
A eurodeputada galega reclamou ademais, durante a sesión plenaria, “o desenvolvemento de lexislación para combater a orixe dos maiores escándalos alimentarios”. “Refírome a poñer en marcha mecanismos que corten a lóxica do modo de produción industrial”, explicou, lembrando que “as fariñas de carne eran legais e sen embargo provocaron un dos maiores escándalos coñecidos na Unión Europea”. “Os controis de hoxe non van evitar os escándalos dos transxénicos ou dos pesticidas de mañá”, advertiu a europarlamentaria.
Así mesmo, Lídia Senra tamén pediu que no desenvolvemento da lexislación en debate se adopten “regras específicas para que os produtos caseiros e a transformación a pequena escala teñan unha normativa propia que permita a súa continuidade e a venda nos mercados locais e circuitos curtos de comercialización”.
