-
Denuncia que esta persoa de Abeledo, en cadeira de rodas, leva desde 2013 sen pode entrar e saír da súa vivenda pola subida de nivel da pista de diante
-
A eurodeputada reclama en Bruxelas que as institucións galegas cumpran os compromisos da Estratexia Europea sobre Discapacidade 2010-2020
Santiago, 09 de abril de 2019. A eurodeputada Lídia Senra, membro do Grupo Confederal da Esquerda Unitaria Europea/Esquerda Verde Nórdica (GUE/NGL) e candidata de En Marea ás eleccións europeas de finais de maio, denunciou hoxe na Comisión Europea (CE) a situación de falta de accesibilidade á súa vivenda que leva padecendo desde hai moitos anos Pilar Fernández López, veciña de Abeledo, en Abadín (Lugo) e que ten unha condición de mobilidade reducida cun grao de discapacidade do 84 por cento, o que a obriga a utilizar sempre cadeira de rodas para os seus desprazamentos.
A europarlamentaria rexistrou esta mañá en Bruxelas un escrito dirixido á CE no que lle informa de que desde hai vinte anos, a pista que pasa por diante da vivenda de Pilar Fernández foi asfaltada en numerosas ocasións, o que provocou unha constante subida no nivel da estrada, estando hoxe por riba de 12 centímetros do nivel da entrada da súa casa, o que lle impide o acceso sen axuda. No 2013, alertada porque se prevía botar novamente aglomerado sobre a pista, a afectada presentou escrito ante o Concello, solicitando non só que non aumentasen a altura do nivel, senón que se aproveitara para eliminar dunha vez a barreira. Despois de todos estes anos, continúa sen recibir resposta nin solución, a pesar de que a situación tamén foi denunciada ante a Valedora do Pobo e ante a Xunta de Galicia, e a pesar de toda a solidariedade xerada e apoio recibido por diferentes colectivos.
Ante esta situación de falta de resposta e solucións por parte das Administracións galegas, Lídia Senra pregúntalle á CE se non considera a Comisión que esta situación vulnera os compromisos da Estratexia Europea sobre Discapacidade 2010-2020. E tamén, se pensa tomar algunha media, tendo en conta o artigo 1, 21 e 26 da Carta dos Dereitos Fundamentais da UE; os 10 e 19 do Tratado de Funcionamento da UE e a Convención sobre os dereitos das persoas con discapacidade das Nacións Unidas.
Senra defende que o que non se pode permitir é que por culpa dunhas obras levadas a cabo por unha Administración nunha vía pública, unha persoa deixe de ter accesibilidade á súa propia casa. “En lugar de avanzar na eliminación de barreiras para persoas con mobilidade reducida, resulta que imos cara atrás”, denuncia a eurodeputada, que non ve xustificación algunha para que desde o Concello ou desde a Deputación provincial ou o propio Goberno galego non actúen de inmediato para rectificar esta situación que nunca se tiña que ter producido. Senra lembra que o artigo 1 da Carta dos Dereitos Fundamentais da UE recolle que “a dignidade humana é inviolable. Será respectada e protexida” e que o artigo 26 establece que “a Unión recoñece e respecta o dereito das persoas discapacitadas a beneficiarse de medidas que garantan a súa autonomía, a súa integración social e profesional e a súa participación na vida da comunidade”. Así mesmo, o artigo 21 de dita Carta prohibe toda discriminación por razón de discapacidade. “Creo que é obvio que se están a incumprir estes dereitos e que se debe corrixir sen máis demora a situación e pedir desculpas a Pilar”, afirma Lídia Senra.
A eurodeputada explica que o Tratado de Funcionamento da UE estipula que a Unión, na definición e execución das súas políticas e accións, debe tratar de loitar contra toda discriminación por razón de discapacidade (artigo 10) e que adoptará accións axeitadas para loitar contra a discriminación por motivo de discapacidade (artigo 19). Tamén a Convención sobre os dereitos das persoas con discapacidade das Nacións Unidas, instrumento internacional xuridicamente vinculante no ámbito dos dereitos humanos do que son partes a UE e os seus Estados membros, exixe a todas as partes que protexan e salvagarden os dereitos humanos e liberdades fundamentais das persoas con discapacidade. “Se temos as normas, pero na práctica non se aplican, de pouco valen”, advirte Senra, que urxe a todas as Administracións a tomar cartas no asunto xa e cumprir os requisitos de accesibilidade de todos os produtos e servizos para a cidadanía. Para Senra, estamos ante un claro caso de “violencia institucional e maltrato contra unha muller con discapacidade no rural. Non podemos deixar pasar máis”.
