- A eurodeputada galega recolle o sentir de estudantes, profesorado e profesionais da cultura en defensa de homologar as titulacións
- Insta á Comisión Europea a tomar medidas para que o Estado español deixe de ser unha excepción entre os países da UE
Santiago, 10 de abril de 2017. A eurodeputada galega Lídia Senra, integrada Grupo Confederal da Esquerda Unitaria Europea/Esquerda Verde Nórdica (GUE/NGL), rexistrou en Bruxelas un escrito dirixido á Comisión Europea (CE) denunciando que as Ensinanzas Artísticas Superiores permanecen na Galiza e no conxunto do Estado español sen integrarse no Sistema Universitario.
Senra denuncia esta situación na institución comunitaria e advirte de que con esta parálise viólase o Convenio Cultural Europeo e o Estado español está a perpetuarse en ser unha excepción en relación co resto de Estados membros da UE, que si teñen estes graos universitarios.
A europarlamentaria recolle o sentir de estudantes, profesorado e profesionais da cultura, que levan anos reclamando que a Universidade Pública ofreza titulacións de Grao e Post-Grao en Ensinanzas Artísticas como única forma de que o Estado español se equipare e converxa do resto de países da UE adheridos ao Convenio Cultural Europeo. “Que o Ministerio de Cultura se negue a abrir unha Mesa de Diálogo coas Comunidades Autónomas para solucionar esta situación e integrar estas ensinanzas dunha vez por todas no sistema universitario é inaceptable”, valora Lídia Senra. É por iso que decidiu facerlle saber á CE o que está a pasar para que tome posición.
E é que non se trata dun simple debate nominal, senón que o feito de que as ensinanzas artísticas non estean na universidade xera consecuencias tanto no plano económico como no cultural. En efecto, rebaixa a percepción do valor que aporta a cultura; impide que os centros nos que se imparten estas ensinanzas poidan establecer relación con outros centros da UE debido á falta de homologación; as alumnas e alumnos non poden acceder á solicitude de residencias universitarias ou aos programas Erasmus; o réxime laboral do profesorado é peor; e tamén supón atrancos para a actividade investigadora.
“Pensa a CE adoptar algunha acción para que o Estado español deixe de ser unha excepción no cumprimento da Convención Cultural Europea nesta materia?, pregúntalle Lídia Senra á Comisión. Ademais, interésase para que a CE se pronuncie sobre se pensa poñer en marcha algún tipo de mecanismo para corrixir a discriminación que sofren os e as estudantes galegos e do Estado español de ensinanzas artísticas no acceso ao programa Erasmus fronte a outros estudantes da UE.
