- Reuniuse esta tarde con representantes do sector do mar, na Confraría de Pescadores da Coruña, e comprometeuse a seguir loitando fronte a unha PPC que non responde aos problemas de aquí
- A eurodeputada e candidata á reelección avoga tamén pola retirada da proposta da Comisión Europea de modificación do Regulamento de control da pesca porque implicará maiores cargas para os barcos de pequena escala
A Coruña, 15 de maio de 2019. A eurodeputada Lídia Senra, candidata de En Marea: Compromiso por Europas ás eleccións europeas do 26 de maio, estivo este mércores pola tarde na Confraría da Coruña, onde mantivo unha reunión con representantes do sector do mar da comarca coruñesa, acompañada pola tamén membro da lista electoral europea, veciña de Oleiros, Luz Marcos Buján, así como por outros membros de En Marea.
Durante o encontro, Senra explicou que neste mandato reclamou a revisión das cotas pesqueiras que se asignan aos Estados e dos criterios que se aplican para o reparto, por non ser coherentes coas necesidades da flota galega. “A pesca artesanal galega non ten cotas dignas suficientes para poder vivir”, denunciou a europarlamentaria e candidata á reelección, que asegurou que, de obter escano de novo, tras as eleccións do 26 de maio volverá reclamar no Parlamento Europeo que a pesca artesanal teña un trato diferenciado e quede fóra de TACs e cotas.
Senra considera que a actual Política Pesqueira Común (PPC) mostrouse incapaz de atallar os problemas da flota galega e das poboacións costeiras, xa que as medidas que se adoitan formular desde as institucións europeas son ditadas polos grandes do sector e moitas veces a súa xestión e aplicación corresponde a persoas que non coñecen as nosas realidades. Así, apostou por seguir presionando tamén para que se retire a proposta da Comisión Europea para modificar o Regulamento de Control de Pesca, porque implicará maiores cargas para a pesca artesanal galega novamente.
Lídia Senra tamén marcou como prioridade para seguir traballando durante os próximos 5 anos, a defensa da limpeza e da rexeneración das rías galegas e poñerlle freo á contaminación das augas. Así, lembrou o traballo feito para denunciar en Bruxelas a situación na que está a ría do Burgo.
“O dereito a empregos dignos e seguros e a supervivencia dos nosos sectores produtivos e dos territorios que viven deles deben estar por riba dos intereses do capital. O sector pesqueiro afronta na próxima lexislatura desafíos coma o Brexit, novas medidas técnicas ou a obriga de desembarque. Por iso é imprescindible continuar tendo unha voz forte no Parlamento Europeo na defensa dos pescadores e pescadoras das flotas galegas”, defende.
