- A eurodeputada mantivo esta posición no marco do debate no pleno do Parlamento Europeo desta semana sobre a refundación de Europa
- Avoga por poñer fin á Unión da Defensa, por respectar o dereito a decidir dos pobos e pola negociación colectiva
Estrasburgo, 16 de xuño de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), durante o debate no pleno do Parlamento Europeo, levado a cabo en Estrasburgo esta semana sobre “Refundación dunha Europa baseada en valores, fundamentada en institucións democráticas eficaces e capaz de promover unha economía próspera nunha sociedade xusta e cohesionada”, acusou ás forzas neoliberais de estar a “xogar coas palabras” e asegurou que, efectivamente cómpre “refundar Europa”, pero “vostedes non están por refundar nada”.
“Vostedes o que nos propoñen, un día si e outro tamén, é seguir afondando nesta UE neoliberal, insolidaria; que trae consigo as políticas de austeridade que destrúen os servizos públicos, aumentan o desemprego, pechan as explotacións labregas, empobrecen a precarizan ás clases traballadoras e ao conxunto das clases populares, aumentan a pobreza infantil que afecta no Estado español xa a 1 de cada 3 nenos e nenas e fomentan o desemprego e a precarización da mocidade, entre outras moitas catástrofes”, considera a parlamentaria. Así, aclarou que refundar a UE baseada en valores e asentada en institucións democráticas significa “construír unha nova Europa partindo de respectar o dereito a decidir dos pobos, de poñer os dereitos humanos por diante dos intereses do libre mercado e do Capital e abandonar definitivamente a axenda neoliberal”.
Para que esta refundación sexa posible, Lídia Senra chamou a retirar “xa” as propostas contidas no chamado informe dos “Cinco Presidentes”, un plan para o futuro da UE asinado no 2015 polo presidente da Comisión Europea, Jean-Claude Juncker, o presidente do Cumio do Euro, Donald Tusk, o presidente do Eurogrupo, Jeroen Dijsselbloem, o presidente do Banco Central Europeo, Mario Draghi, e o presidente do Parlamento Europeo, daquela Martin Schulz, que inclúe afondar na Unión Económica e Monetaria co fin de completala no 2025 como moi tarde; ou crear un sistema de autoridades da competitividade da zona euro, cuxas opinións deberán ser utilizadas polos interlocutores sociais durante as negociacións para fixar os salarios. “Parece que xa non lles abonda coas reformas laborais, que aínda precisan dunha autoridade da competitividade que controle ou limite en aras da competitividade o nivel dos salarios, como fan na acutalidade cos prezos agrícolas”, criticou a deputada.
A europarlamentaria tamén engadiu que “deben poñer fin ademais ao proxectos de Unión da Defensa na que van utilizar miles e miles de millóns de euros dos orzamentos, tanto da UE como dos Estados membro, para avanzar na construción dun aparato militar para seguir impoñendo pola forza os intereses desta Unión neoliberal e en detrimento das políticas de emprego, das políticas sociais e do mantemento dos servizos públicos”.
