- Once eurodeputadas/os terán encontros institucionais e coñecerán modelos produtivos e sistemas de trazabilidade da carne de vacún
- Senra, moi crítica cas negociacións UE-MERCOSUR e co proceso de industrialización alimentaria, alerta das consecuencias para Galiza
Bruxelas, 3 de Abril de 2018. Durante esta semana a eurodeputada galega do Grupo Confederal da Esquerda Unitaria Europea/Esquerda Verde Nórdica (GUE/NGL), Lídia Senra, está participando nunha delegación da Comisión de Agricultura do Parlamento Europeo a Brasil. Senra, que ademais é a coordenadora para o GUE/NGL nesta Comisión e responsábel a nivel do Parlamento Europeo da transversalización da perspectiva de xénero na mesma, forma parte dun grupo de once eurodeputadas de distintos grupos políticos que manterán reunións convarios estamentos políticos. O Parlamento Europeo procura con esta visita levar a cabo unha recopilación e análise de información sobre a produción, comercio e exportacións de gando e carne de vacún, así como sobre os controis e rastreabilidade que están a ser aplicados no país.
A través da súa participacións nesta delegación europarlamentaria, enmarcada no proceso de negociación que a UE está levando adiante cos países do MERCOSUR (Brasil, Argentina, UruguayeParaguay), a eurodeputada galega porá sobre a mesa unha análise crítica co pulo á desregularización que pretende este acordo comercial[1].
“Logo de tantos anos de aplicación de políticas neoliberais, que basicamente o que buscan é precisamente desmontar as estruturas de control político democrático sobre a produción e o comercio mundial, fica claro que para as clases populares e traballadoras as consecuencias son a destrución do emprego, a redución dos salarios, impactos negativos nos sistemas públicos de educación e saúde e un longo etcétera de perda de dereitos”, advertiu.“Se o que queremos é o benestar social e non os beneficios duns poucos, tanto na UE como nos países do MERCOSUR, cómpre avogar por políticas agroalimentarias orientadas cara a soberanía alimentaria dos pobos e baseadas no modelo de produción agroecolóxico, arroupadas por políticas sociais que blinden os servizos públicos de ámbolos dous lados do Atlántico”.
En consonancia coa preocupación expresada pola UE en relación á falta de transparencia nos protocolos de acreditación vinculados á exportación de carne brasileira –no ano 2017 a UE suspendeu as importacións logo de detectar “fallos sistémicos” nos controis de calidade de distintos tipos de produtos cárnicos-, a delegación de eurodiputadas/os prestará especial atención a aspectos vinculados ao ámbito sanitario, tales como os procedementos de trazabilidade do gando, os sistemas de autocontrol e auditoría, ou a propia fiabilidade das inspeccións realizadas polas autoridades nacionais.
O primeiro destino é Brasilia, onde hoxe martes 3 ten lugar un intercambio de impresións co Ministro de Agricultura, Gandaría e Subministro de Alimentos, H.E. Blairo Borges Maggi; o Presidente da Confederação Nacional da Agricultura (CNA), João Martins da Silva Júnior e o Presidente da Empresa Brasileira de Pesquisa Agropecuária (EMBRAPA), Maurício Lopes. Durante este encontro representantes da Secretaría de Mobilidade Social e Cooperativismo presentarán aspectos do plan de implementación do Código Forestal Brasileiro, criticado dende ámbitos académicos e sociais por considerar que pon inda máis en risco a conservación da Amazonía brasileira.
A continuación haberá un almorzo de traballo, no que ademais do Presidente da CNA estará presente tamén o Director do Departamento de Promoção Internacional do Agronegócio, Evaldo da Silva Junior; o Secretario de Relações Internacionais do Agronegócio (SRI) do Ministério da Agricultura, Pecuária e Abastecimento (MAPA), Odilson Silva, e o Director do Departamento de Promoção Internacional do Agronegócio, Evaldo da Silva Junior.
Durante a tarde a delegación de eurodeputadas/os visitará o Senado Federal, onde se reunirán co senador Romero Jucá, pechando a rolda de xuntanzas en Brasilia cun intercambio de impresións co Departamento de Inspeção de Produtos de Origem Animal (Dipoa), que fará unha presentación do sistema gubernamental de control e inspección de carne bovina destinadas á exportación á UE.
Precisamente é o capítulo agroalimentario nas negociacións UE-MERCOSUR o que está evidenciando máis discrepancias entre as partes negociadoras. A día de hoxe, o 19,8% das importacións agrícolas da UE proveñen xa do MERCOSUR. Dentro deste ámbito, concretamente a posibilidade dun incremento de exportacións gandeiras á UEé un aspecto que preocupa especialmente á eurodeputada galega. “Ao estar negociando con Brasil e Arxentina sabemos que un dos puntos máis sensíbeis é precisamente a entrada na UE de grandes cantidades de carne de vacún, algo que afectará directamente á Galiza”, advirte. “As áreas de montaña no noso país dependen do vacún de carne e esta situación súmase á que provocará o aumento das importacións de carne procedentes do Canadá ao abeiro do CETA”.
A axenda de traballo en Cuiabá, no Estado de Mato Grosso, comenzará mañá mércores 4 e estará caracterizada polo traslado da delegación europarlamentaria a ver in situ o proceso de tecnoloxización que acompaña a agroindustrialización do xigante brasileiro. A primeira hora da mañá visitarán as instralacións da Fazenda Nova Chapada, rexistrada no Sistema Brasileiro de Identificação e Certificação de Bovinos e Bubalino (SISBOV). Logo do xantar coñecerán a Fazenda Fartura, tamen rexistrada no SISBOV e especializada na cría de distintas razas bovinas en sistemas de confinamento e semiconfinamento.
Durante toda a xornada do xoves día 5 sucederanse as reunións institucionais, desta volta co Gobernador do Estado Federal de Mato Grosso, Pedro Taques; o Secretario de Agricultura Familiar e AssuntosFundiários (SEAF-MT), Suelme Evangelista Fernandes; o Presidente da Federação da Agricultura e Pecuária do Estado de Mato Grosso (FAMATO), Normando Corral; o Presidente do Instituto de Defesa Agropecuária do Estado de Mato Grosso, Guilherme Linares Nolasco, e o Superintendente Federal de Agricultura no Estado de Mato Grosso, José de Assis Guaresqui.
Seguidamente as once deputadas/os europeas/os coñecerán as instalacións dun dos matadoiros de Minerva Foods S.A., especializada en venda de carne procesada, e logo do xantar visitarán unha terceira explotación integrada no sistema SISBOV, a Fazenda Serra Azur.
Pecharán a xornada con últimas entrevistas con representantes da FAMATO.
[1]Pódese acceder a unha cronoloxía do proceso negociador UE-MERCOSUR, así como a documentación asociada, a través do sistema de información sobre comercio exterior da Organización de los Estados Americanos: http://www.sice.oas.org/TPD/MER_EU/MER_EU_s.asp
