- O voto en contra do PPE e a abstención dos socialistas impiden aprobar unha emenda sobre a fin das prospeccións de hidrocarburos no océano
- Senra recorda que a primeira vítima da contaminación mariña é o sector pesqueiro, polo que a prevención ten que ser prioritaria
Bruxelas, 1 de xuño 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), acusou este xoves á dereita e aos socialistas de impedir, cos seus votos no pleno do Parlamento Europeo que hoxe se celebrou en Bruxelas, que a Eurocámara se pronuncie para deter a minaría nos fondos mariños, as prospeccións de gas e petróleo e as actividades ligadas ao Crecemento Azul no contexto da meta 14 de Desenvolvemento Sostible da ONU para os océanos. A eurodeputada galega presentou cinco emendas a unha resolución do Parlamento Europeo de cara á Conferencia de Alto Nivel da ONU que se celebrará a vindeira semana en Nova Iorq, nas que se pedía a paralización da minaría nos fondos e a anulación da concesión mineira Solwara 1 en augas de Papúa Nova Guinea -a busca de hidrocarburos e as actividades ligadas ao chamado “Crecemento Azul”, que poden ir en detrimento das zonas de pesca. Os eurodeputados e eurodeputadas dos dous grandes partidos detiveron esta petición cos seus votos malia os impactos negativos que estas actividades ocasionarían no medio ambiente e no sector pesqueiro. Na votación da emenda na que se pedía deter estes proxectos, 335 eurodeputados/as da dereita votaron en contra, 119 a favor e 174 abstivéronse.
Lídia Senra interveu na sesión plenaria para esixir unha gobernanza internacional dos océanos que protexa o sector pesqueiro artesanal e a pequena escala da contaminación mariña e dos impactos que ocasiona a explotación dos océanos a mans de multinacionais que só buscan o lucro privado. “A prevención e a redución da contaminación mariña deben considerarse dun xeito moi serio, xa que os pescadores e pescadoras son as vítimas principais e non poden levar toda a responsabilidade na conservación dos recursos pesqueiros”, defendeu a eurodeputada no debate da resolución, destinada a fixar a postura do Parlamento Europeo respecto da implementación da meta 14 das Nacións Unidas para 2030 sobre Desenvolvemento Sostible.
A eurodeputada galega considera que a prevención e a redución da contaminación precisa de accións drásticas, que amosen un compromiso serio, e que deben pasar pola “necesidade de impedir calquera actividade que poña en perigo a pesca e o medio ambiente”. Senra referiuse expresamente á mina Solwara 1 en Papúa Nova Guinea, a primeira concesión de explotación mineira en fondos mariños, localizada nunha zona hábitat de corais e numerosos cetáceos e un exemplo evidente da colisión da minaría coa boa conservación dos recursos pesqueiros. “O Comisario de Pesca, Karmenu Vella, debe lograr que a UE faga bandeira desta cuestión. Os mariñeiros e mariñeiras son as vítimas principais deste tipo de actividades, por non falar do impacto xerado polo transporte marítimo ou a presión urbanística sobre os recursos pesqueiros e a supervivencia económica das comunidades costeiras”.
Polo tanto, toda decisión sobre o futuro dos subsidios da pesca deber ter en conta que a pesca artesanal e a pequena escala, de carácter local e a miúdo familiar, é fundamental para as comunidades costeiras e non debe sufrir as consecuencias da sobrepesca e malas prácticas da gran pesca industrial”, defendeu. Ademais, Senra chamou a atención tamén sobre “a necesidade do saneamento e rexeneración das rías e da paralización das obras que causan cambios de correntes e impactan no medio natural”.
A eurodeputada galega recorda que un estudo recente da comisión de Pesca do Parlamento Europeo acaba de poñer negro sobre branco o impacto negativo do Crecemento Azul na UE sobre as pesquerías a pequena escala e o sector artesanal, entre elas unha maior presión polo espazo nos océanos, cambios nas dinámicas costeiras, contaminación mariña e impacto sobre o fondo mariño.
A meta 14 da ONU sobre os océanos
A Axenda das Nacións Unidas para 2030 inclúe 17 metas para lograr o Desenvolvemento Sostible en todo o mundo. Desas metas, a número 14 refírese aos océanos, ameazados pola contaminación mariña pero tamén terrestre, fluvial e atmosférica.
A ONU celebrarán entre o 5 e o 9 de xuño unha Conferencia de Alto Nivel en Nova Iorq para analizar os avances conseguidos respecto desta meta 14, que afecta aos océanos e que inclúe obxectivos como o de reducir significativamente a contaminación mariña, abordar e minimizar o impacto da acidificación dos océanos, regulamentar eficazmente a pesca ilegal, non declarada e non regulamentada e as prácticas destrutivas ou prohibir, á altura de 2020, certas subvencións que contribúan á sobrepesca.
