- Pídelle á CE que se poña en contacto coas autoridades nacionais para coñecer os motivos de promover este proxecto contrario a directivas
- A eurodeputada denuncia que o enterramento de residuos industriais afectaría a acuíferos que subministran auga para consumo humano
Lousame, 8 outubro 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), reuniuse este sábado coa veciñanza e con membros da Plataforma contra o novo vertedoiro de residuos industriais en Lousame, na comarca do Barbanza, para escoitar de primeira man as súas reivindicacións, visitar os terreos afectados por este proxecto e amosar todo o seu apoio á loita que están levando a cabo. Neste sentido, Senra deixou rexistrada xa esta semana no Parlamento Europeo unha pregunta por escrito dirixida á Comisión na que denuncia que este proxecto incumpre diferentes directivas tanto internacionais como galegas e insta ás institucións da UE para que desde Bruxelas se investigue o tema e se lle chame a atención ás autoridades competentes.
A eurodeputada de AGEe recolle no seu escrito que, tendo en conta que o proxecto está destinado a acumular 770.000 toneladas de residuos industriais nun espazo de 1.100.000 metros cúbicos en dez anos e que as tres cuartas dos residuos tratados nas instalacións serían enterrados, o macrovertedoiro de Lousame vai contra os principios establecidos na Directiva 1999/31/CE, que recolle que os chamados vertidos controlados ou enterramentos de residuos é a forma menos sostible de eliminar residuos en relación co medio ambiente e debe reducirse ao mínimo.
Lídia Senra tamén incide no texto enviado á CE que o proxecto é contrario igualmente ao Plan de Xestión de Residuos Industriais de Galiza (2016-2022), aínda en fase de tramitación, que se marca como obxectivo tender ao establecemento da economía circular , minimizar refugallos e aumentar a reciclabilidade dos residuos. Mais aínda, a membro de AGEe denuncia que o macrovertedoiro de Lousame afecta a acuíferos que subministran auga para o consumo humano e a un hábitat de interese comunitario prioritario do tipo 4020 (xa que na zona hai Brezales húmidos atlánticos de Erica ciliaris).
Ante tal situación e tendo en conta que o proceso de tramitación do proxecto xa vai avanzado, posto que o prazo para presentar alegacións remata o 15 de outubro, a eurodeputada insta á Comisión Europea para que requira das autoridades española e galega competentes na materia unha explicación ao respecto de cal é o motivo para que un proxecto contrario a directivas internacionais, e incluso á propia lexislación nacional, continúe a ser promovido.
Esta pregunta non é a primeira relativa á xestión de residuos na Galiza que Lídia Senra presenta en Europa. De feito, hai un mes aproximadamente, a eurodeputada de AGEe visitou a parroquia de Lesta, no concello de Ordes, onde tamén está proxectada a instalación dun macrovertedoiro de residuos industriais, que se situaría xusto á beira do macrovertedoiro de residuos sólidos urbanos que Sogama ten na Areosa, no concello limítrofe de Cerceda. Como resultado daquela reunión coa Asociación de Afectados/as, presentou dúas preguntas por escrito poñendo de relevo ante a CE o posible incumprimento por parte do Goberno galego da normativa comunitaria de xestión de augas para consumo humano e tamén o posible incumprimento por parte da Xunta de Galiza da normativa comunitaria de xestión de residuos. Polo momento, as preguntas aínda non foron contestadas. Normalmente, a CE adoita tardar ao redor de dous meses en dar resposta aos textos presentados por escrito.
Para Lídia Senra, a solución ao problema dos residuos na Galiza ten que pasar por unha “solución efectiva baseada de verdade na prevención, reutilización e reciclaxe”. “Cómpre estudar modelos que están demostrando xa a súa viabilidade, como por exemplo o da cidade de Liubliana, que ten unha taxa de reciclaxe dez puntos por enriba do obxectivo da UE para o 2020 (50%)”, defendeu a eurodeputada.
