- Denuncia que a construción da Liña de Alta Velocidade Portocamba-Cerdedelo, financiada con Feder, está a deteriorar a calidade das augas
- A eurodeputada asistirá este xoves ás 19:30 hrs. en Cerdedelo á Marcha en defensa do río convocada por Adega e Salvemos o Támega
Santiago, 8 de agosto de 2018. A eurodeputada galega Lídia Senra ven de instar á Comisión Europea (CE) para que leve a cabo unha investigación e seguimento tanto dos fondos europeos que se están a empregar na construción da Liña de Alta Velocidade Portocamba-Cerdedelo (Ourense) como do cumprimento na contorna das obras da lexislación comunitaria sobre vertidos de residuos e lexislación sobre a calidade da auga e protección de espazos naturais. A europarlamentaria rexistrou un escrito en Bruxelas no que informa á CE de que as obras de construción do AVE que se están levando a cabo no concello de Laza cofinanciadas con fondos Feder están a afectar ao río Támega, que está cualificado como Lugar de Importancia Comunitaria (LIC) na Rede Natura 2000, e aos seus afluentes.
Senra basea a súa denuncia ante a Comisión Europea nas analíticas realizadas, cuxos resultados amosan un grave deterioro da calidade ambiental da agua, xa que elementos como o arsénico e o plomo multiplican os niveis de contaminantes admitidos. “Estando autorizadas verteduras tras o seu tratamento, as análise e problemas detectados fan sospeitar que se verten sen tratamento”, asegura. Á espera tamén da resolución das denuncias presentadas por diferentes organismos na Confederación Hidrográfica do Douro e do Miño-Sil e das dilixencias abertas polo xulgado de primeira instancia e instrución número 2 de Verín para investigar a contaminación e das actuacións de oficio iniciadas polo Defensor do Pobo, Lídia Senra reclama que a CE actúe canto antes para facerlle fronte á gravidade destes feitos e realice un seguimento.
A Comisión Europea deberá dar contestación á eurodeputada nas próximas semanas e Senra tamén ten previsto asistir este xoves, 9 de agosto, ás 19:30 horas, a Cerdedelo (Laza), para participar na Marcha Reivindicativa en defensa do Támega convocada por Adega-Monterrei e pola Asociación Salvemos o Támega, co apoio da CIG, BNG, En Marea e o Concello de Verín. “Da saúde das nosas augas depende a saúde das persoas. Por iso, evitar a súa contaminación debe estar por riba de todo”, defende a eurodeputada.
