- A eurodeputada denuncia na Comisión que o parque, acollido ao Plan de Competitividade Turística Puertas de Galicia do 2011, está sen facer
- Reclama que se abra unha investigación desde o inicio para ditaminar a posible existencia dun uso fraudulento dos fondos europeos
Santiago, 4 de xullo de 2018. A eurodeputada galega Lídia Senra reclama que a Comisión Europea (CE) realice un seguimento dos fondos FEDER (Fondo Europeo de Desenvolvemento Rexional) que se levan investidos no chamado Parque aventura de Laza, un proxecto que a día de hoxe continúa sen estar en funcionamento e coas obras sen rematar, a pesar de que foi un dos investimentos máis cuantiosos do chamado Plan de Competitividade Turística Puertas de Galicia presentado no 2011. A europarlamentaria rexistrou en Bruxelas unha pregunta por escrito dirixida á CE sobre o citado parque de aventura que cambiou até en 3 ocasións de nome, chegando a denominarse “Territorio Feiticeiro”, “Bosque Mágico” e “Santiago Park”.
O 11 de febreiro do 2011 publicouse no Boletín Oficial do Estado Español (BOE), a resolución do 26/01/2011, da Secretaría Xeral de Turismo e Comercio interior, pola que se publicaba o Convenio de colaboración coa Comunidade Autónoma de Galicia, a Asociación de Municipios para o Plan de Competitividade turística das comarcas de Monterrei e Conso-Frieiras, e a Asociación de Empresarios do Turismo e Hostelería Puertas de Galicia, para o desenvolvemento do Plan de Competitividade Turística Puertas de Galicia. Aínda que no convenio os compromisos de financiamento proceden de Turespaña, a Consellería de Cultura e Turismo e a Asociación de Municipios das comarcas de Monterrei e Conso-Frieiras, na cláusula 7 do citado convenio di: “No caso de tratarse de rexións elixibles con arranxo aos obxectivos da política de cohesión comunitaria (2007-2013), e a fin de poder xustificar as contribucións efectuadas ante os órganos competentes da Comisión Europea, deberán aportarse as copias compulsadas das facturas orixinais das actuacións do Plan que se soliciten”.
Senra reclama que a Comisión tome cartas no asunto e revise canto antes os fondos que se levan investidos aquí, nun proxecto que sigue sen levarse a cabo e que, considera, debera ser investigado para ditaminar a posible existencia dun uso fraudulento de fondos europeos. A CE debería dar contestación nun prazo de entre 4 e 6 semanas á pregunta da eurodeputada galega.
