- A eurodeputada galega denuncia en Nairobi que a UE está roubando o dereito de cada pobo a decidir as súas políticas agrarias e alimentarias
- Asegura que os acordos de libre circulación provocan a desaparición das labregas e labregos en favor das grandes explotacións industriais
Santiago,20 de decembro do 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), está desde o pasado venres na capital de Kenia, en Nairobi, participando na 32ª Sesión da Asemblea Parlamentaria Paritaria ACP-UE (África Caribe Pacífico – Unión Europea), da que é membro desde o inicio da lexislatura, e que se está a celebrar á vez que a 44ª Sesión da Asemblea de Parlamentarias/os da ACP.
A delegación internacional, que reúne a deputadas e deputados do Parlamento Europeo e a parlamenarias/os de 78 países de Africa, Caribe e Pacífico, debateu na plenaria, entre outros asuntos, un informe sobre agricultura familiar, no que Lídia Senra tomou a palabra. “É unha realidade que a inmensa maioría da produción de alimentos no mundo está en mans das pequenas e medianas granxas familiares, o que se acostuma a chamar agricultura familiar”, dixo, e, neste contexto, defendeu que “as persoas que traballan nestas graxas teñen o dereito a seguir producindo a alimentación básica para os seus pobos e para alimentarse a si mesmas”, un dereito que, denunciou, “as actuais políticas agrarias nos están roubando para traspasarllo ás grandes explotacións industriais”. Neste sentido, a eurodeputada galega reclamou como “imprescindibles” políticas públicas que garantan o acceso aos recursos e uns “prezos en orixe decentes”. “Cada pobo debe ter tamén o dereito a decidir as súas política agrarias e alimentarias en base ás súas necesidades”, defendeu.
Lídia Senra afirmou que “actualmente as pequenas e medianas granxas familiares en todo o mundo son vítimas das políticas agrarias da Unión Europea e dos Estados Unidos, que a través das súas leis e recursos apostan pola agricultura industrial”. “A UE e os Estados Unidos de América, a través dos acordos de libre comercio e da Organización Mundial do Comercio, están impoñendo a súas regras neoliberais, con políticas de desregulamentación que afunden os prezos en orixe e expulsan ao campesiñado dos seus mercados tradicionais; deixando ás labregas e labregos totalmente desprotexidos fronte ao abuso da gran distribución, do negocio agroexportador e das decisións ou necesidades dos países importadores”, asegurou.
Na súa intervención en Kenia, insistiu en que estas políticas neoliberais “frearon ou paralizaron totalmente as reformas agrarias e dificultan cada vez máis o acceso á terra e favorecen de distintas formas o acaparamento de terras e dos recursos naturais en todo o planeta”.
Feita esta análise, Lídia Senra considerou que o informe de partida abordado na 32ª Sesión da Asemblea Parlamentaria Paritaria ACP-UE ten aspectos moi positivos, con posicións claras contra o acaparamento de terras, os transxénicos, as sementes, a auga e os recursos naturais. Sen embargo, no traballo en Comisión aprobáronse dúas emendas que, considera, “desvirtúan o texto orixinal e nós rexeitamos totalmente”, en referencia á posición que manten AGEe.
Nunha das emendas, introducida pola dereita europea, mantense que o feito de que “estas explotacións empreguen máis man de obra perpetúa a pobreza”. “Desde logo, nada máis lonxe da realidade, manter empregos xera riqueza, pero os traballadores e as traballadoras son pobres e a pobreza perpetúase coas políticas de prezos de miseria, salarios baixos e concentración da riqueza”, dixo Senra.
A outra emenda fai referencia a que os acordos de libre circulación de bens e servizos a nivel rexional e os acordos rexionais de libre cambio e de infraestruturas son positivos para as pequenas explotacións. “Nós sabemos que sucede todo o contrario, que a nosa integración rexional (UE) trouxo como consecuencia a desaparición de miles de explotacións e que este proceso permanente aínda non acabou; ademais de traer á vez a dependencia alimentaria, xa que importamos unha gran cantidade de alimentos porque perdemos produción e mercados a favor de que os produtos das multinacionais agroalimentarias e da distribución circulen libremente”, denunciou.
É por este motivo que Lídia Senra presentou para o pleno emendas de supresión destes dous apartados, e só se foran aprobadas AGEe podería apoiar o citado informe.
A eurodeputada galega permancerá en Nairobi até este mércores, cando rematará a Asemblea.
