- Sinalan unha fonda preocupación polo discurso do odio e as numerosas mostras de violencia de xénero que acontecen no contexto de partidos
- Reclámanlle a Ceferin e a Infantino que poñan fin de forma urxente á tolerancia das institucións neste campo e denuncien todos os casos
Santiago, 5 de xullo de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), é unha das máis de setenta eurodeputadas e eurodeputados que veñen de asinar unha carta conxunta dirixida a Aleksander Ceferin, Presidente da Unión de Asociacións Europeas de Fútbol (UEFA), e a Gianni Infantino, Presidente da Federación Internacional de Fútbol Asociación (FIFA). Como membros do Parlamento Europeo, as persoas que subscriben a misiva amosan a súa fonda preocupación “con respecto ás numerosas expresións de sexismo, discurso do odio e violencia de xénero que acontecen durante os partidos de fútbol”.
As europarlamentarias e europarlamentarios aseguran que non están a falar de “casos aillados ” xa que “tanto nos estadios de fútbol como noutras contornas deportivas, os casos de violencia de xénero e sexismo son comúns”. “Sen embargo, -din- debido á falta de datos de incidencia e de protocolos, a maioría destes casos permanecen desapercibidos e non son denunciados en público”.
Senra, ao igual que o resto de persoas que impulsaron esta carta, critican que as condenas por parte das autoridades deportivas ou dos clubes de fútbol contra o sexismo e a violencia de xénero son case inexistentes, “o cal é o resultado da subestimación do problema”. Así, reiteran que “a violencia de xénero non é un asunto privado” e reclaman que “sexa tratado co mesmo protocolo que as agresións ou insultos racistas”.
Ademais, fan fincapé no feito de que os casos de discurso sexista son tamén comúns contra árbitros mulleres, deportistas de elite femininas e outras mulleres que asisten a encontros deportivos. “A aceptación e tolerancia destas actitudes reforza o papel dos agresores”, advirten, “e promove a tolerancia contra estes crimes e difunde un sentimento de impunidade”. “Tamén minimiza esta realidade, estigmatiza á vítima e normaliza este tipo de agresións”, engaden.
Fronte a esta realidade, as deputadas e deputados instan ao presidente da UEFA e ao da FIFA a que como responsables das principais institucións futbolísticas denuncien publicamente e firmemente todos os casos de sexismo e poñan fin de forma urxente á tolerancia institucional contra o sexismo e a violencia contra as mulleres. “Tanto a FIFA como a UEFA teñen condenado previamente os insultos racistas e incluso teñen imposto multas a algúns clubes de fútbol por cánticos e agresións racistas. Polo tanto, pedimos que tomen estes casos moi en serio e faga todo o posible por erradicar esta terrible realidade” que afecta ás mulleres. Máis alá, instan tanto á FIFA como á UEFA a que inicien unha campaña pública para establecer un protocolo concreto para combater o sexismo e a violencia contra as mulleres no deporte.
A carta está asinada non só por deputados e deputadas do GUE/NGL, senón tamén por parlamentarios e parlamentarias de S&D, ALDE, Greens/EFA, EPP, ECR e EFDD de diferentes Estados.
