- A voceira de AGEe asina unha carta conxunta para a alta presentante da Unión Europea para Asuntos Exteriores, Federica Mogherini
- Reclaman acordos e conversacións co Goberno do Estado de Israel para garantir a integridade das persoas e a libre navegación do barco
Santiago, 5 outubro 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), xunto a outras 14 eurodeputadas e eurodeputados do Estado español, veñen de remitir unha carta á Alta Representante da Unión Europea para Asuntos Exteriores, Federica Mogherini, na que reclaman que se inicien por parte da UE os “acordos e conversacións necesarios co Goberno do Estado de Israel para protexer a integridade” dos dous barcos que conforman a Flotilla das Mulleres Rumbo a Gaza e que partiron a finais de setembro de Messina e de Barcelona.
Na misiva, as eurodeputadas e eurodeputados –Lídia Senra, Marina Albiol, Xabier Benito, Javier Couso, Tania Gonzalez, Josu Juaristi, Paloma López, Ernest Maragall, Lola Sánchez, Jordi Sebastià, Josep-Maria Terricabras, Estefanía Torres, Miguel Urbán, Ernest Urtasun e Ángela Vallina-, alertan de que o Goberno israelí de Benjamín Netanyahu xa ordenou ao exército israelí achegarse este mércores aos barcos e impedirlle chegar a Gaza para mostrar a solidariedade de millóns de cidadáns de todo o mundo co pobo e as mulleres palestinas e chamar a atención sobre a crise humanitaria que sofren dende o 2006.
As eurodeputadas e eurodeputados asinantes advirten de que “esta ameaza pon en serio perigo a integridade física” das mulleres de trece nacionalidades diferentes que viaxan nesta Flotilla, entre as que se encontran cidadás europeas, coma a Premio Nobel da Paz irlandesa Mairead Maguire ou a fotógrafa española Sandra Barrilaro.
Tendo en conta que a primeira Flotilla que tentara chegar a Gaza polo mar no 2010 rematou coa asalto ao barco turco Mavi Marmara a mans do exército israelí, acabando na morte de dez activistas turcos, Lídia Senra e as outras 14 persoas asinantes reclaman de urxencia que a UE medie o necesario co Estado de Israel para que se permita a “libre navegación da Flotilla ata que acade Gaza” e se protexa a integridade das mulleres que van nela.
A maiores, a eurodeputada galega Lídia Senra, apoia as convocatorias –realizadas pola Marcha Mundial das Mulleres, BDS-Galiza e Womens’s Boat Gaza– de concentracións de protesta pola ameaza israelí á Flotilla das Mulleres Rumbo a Gaza, previstas para hoxe ás 19 horas da tarde en Ourense –fronte á Subdelegación do Goberno-, Compostela –Praza do Pan-, A Coruña – Praza de Ourense-, Ferrol – Praza do Concello-, Vigo –Praza do MARCO-, Lugo –Praza do Concello-, e Pontevedra –Praza da Peregrina-.
Lídia Senra asistiu ademais o martes pola tarde no Parlamento Europeo, en Estrasburgo, á reunión organizada polo GUE/NGL, na que tres coordinadoras da Flotilla de Mulleres Rumbo a Gaza informaron sobre o proxecto de solidariedade internacional.
