- Realizou hoxe unha viaxe pola ría de Pontevedra acompañada por colectivos pesqueiros e sociais, aos que explicou que seguirá dando a batalla para sacar a Ence da ría e non permitir o cebo de peixes no mar
- Defende que se suba ao 0,30 o coeficiente redutor da idade de xubilación para todos os traballadores e traballadoras do mar que están por debaixo, como son por exemplo as mariscadoras e redeiras
Pontevedra, 11 de maio de 2019. A eurodeputada galega Lídia Senra, candidata de En Marea:Compromiso por Europa ás eleccións europeas do 26 de maio, realizou hoxe ao mediodía unha viaxe pola ría de Pontevedra, a bordo do Catamarán O Pelegrín, acompañada por diferentes colectivos pesqueiros e sociais da zona e pola candidata de Avante Poio ás eleccións municipais, Silvia Díaz, e a integrante da lista electoral europea Celsa González Ogando.
Durante o percorrido, Senra considerou fundamental seguir loitando en Europa para lograr unhas rías limpas, para sacar a ENCE da ría e para non permitir o cebo de peixes no mar e poder frear a acuicultura industrial. Así mesmo, defendeu que se suba ao 0,30 o coeficiente redutor da idade de xubilación para todos os traballadores e traballadoras do mar que están por debaixo, como son por exemplo as mariscadoras e redeiras. Tamén marcou como prioridade continuar a traballar para que conste o país de orixe na etiquetaxe dos produtos do mar. “Xa o defendemos neste mandato no Parlamento Europeo, recollendo a demanda específica do sector mexilloeiro, e seguiremos traballando para que se faga realidade canto antes na UE”, dixo Senra.
Na viaxe en barco, a eurodeputada tivo a ocasión de poder intercambiar impresións cos membros de Ameconra (Asociación de mexilloeiros de Combarro e Raxó), da Asociación de mulleres do mar de Poio, da Irman Illa de Tambo, da Asociación de veciños, cultural e recreativa de Combarro, da Asociación Umia Vivo, do Colectivo pola defensa do territorio Anovaterra e do Colectivo pola defensa do patrimonio A Forneiriña.
A eurodeputada tamén visitou a feira de Catro Ponlas en Pontevedra en apoio ao comercio xusto
Antes desta visita pola ría, tamén hoxe Lídia Senra, acompañada do voceiro de En Marea, Luís Villares, e polos integrantes da lista electoral europea Xoán Hermida e Celsa González, visitou pola mañá a feira Catro Ponlas na propia cidade de Pontevedra, onde reivindicou o comercio xusto como base para que os labregos e labregas poidan vivir dignamento do seu traballo e para que se poida levar un maior desenvolvemento local. “A UE debe apostar pola soberanía alimentaria e o comercio de proximidade como vía para manter o emprego no rural”, defendeu. (Máis información entrando aquí)
Acto feminista en Santiago
Senra completará a axenda de hoxe cun encontro feminista ás 18:30 horas na Casa das Mulleres de Santiago de Compostela. A eurodeputada considera prioridade total que a UE promova a incorporación e a participación das mulleres en pé de igualdade en todos os ámbitos, que se acabe coa fenda salarial e de xénero e que se poñan sobre a mesa políticas e medidas que permitan erradicar no día a día a violencia machista.
