- A eurodeputada galega estará en Derio desde o luns e até o xoves e intervirá o martes nunha mesa redonda na V Asemblea de Mulleres da Vía sobre “Participación política das mulleres”
- A parlamentaria tamén estará presente na Cerimonia de Apertura da Conferencia o mércores pola mañá, onde realizará unha intervención os desafíos para a agricultura europea
Santiago, 14 de xullo de 2017. A eurodeputada galega Lídia Senra, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), desprazarase a próxima semana até o País Vasco para participar nos actos organizados con motivo da V Asemblea de Mulleres da Vía Campesina, que se celebrará o luns e o martes, baixo o lema de “Construímos movemento para cambiar o mundo, con feminismo e soberanía alimentaria”; e tamén para participar na VII Conferencia Internacional da Vía Campesina que se desenvolverá a partir do mércores no municipio de Derio baixo o lema “Alimentamos os nosos pobos e construímos movemento para cambiar o mundo!”.
Concretamente, Senra participará o martes entre as 8:45 e as 9:45 horas da mañá intervindo nunha mesa redonda sobre “Participación política das mulleres”.
Xa o mércores pola mañá, a europarlamentaria asistirá á Cerimonia de Apertura da VII Conferencia da Vía Campesina, onde está previsto que realizará unha pequena intervención sobre a importancia de realizar este encontro en Europa, sobre os desafíos aos que se enfronta actualmente a agricultura europea, a súa conexión con procesos globais, e as accións levadas a cabo desde o Parlamento Europeo para intentar cambiar ou darlle voz ás labregas e labregos.
Segundo a organización, está previsto que uns 500 labregos e labregas, membros de máis de 160 organizacións procedentes de 73 países de todo o mundo, se reúnan en Derio nesta cita internacional, co obxectivo de intercambiar experiencias, debater e reafirmar o seu compromiso en construír un camiño común cara á soberanía alimentaria, baseado nos dereitos e na herdanza das labregas e labregos, poboacións rurais, pobos indíxenas e outros pequenos produtores e produtoras de alimentos.
