- A eurodeputada critica que a Xunta de Galicia non estea a informar sobre o procedemento e consecuencias de declarar a área Ben de Interese Cultural
- As conclusións europeas de gobernanza participativa no patrimonio cultural inclúen que se promova a participación das partes interesadas nas decisións
Santiago, 09 de maio de 2018. A eurodeputada galega Lídia Senra ven de denunciar ante a Comisión Europea (CE) a falta de participación das comunidades afectadas no Ben de Interese Cultural (BIC) Ribeira Sacra. Así o recolle nunha pregunta por escrito recentemente rexistrada en Bruxelas[1], na que pon ao organismo comunitario ao tanto de que en decembro de 2017, a Consellería de Cultura, Educación e Ordenación Universitaria da Xunta de Galicia decidiu dar inicio ao procedemento para declarar unha extensa área, a Ribeira Sacra, como BIC. “Abriuse un periodo de información pública durante tres meses e durante o cal non houbo ningunha información oficial”, asegura Senra.
A europarlamentaria, asegura que o problema deste procedemento é que hai “unha total ausencia de participación das comunidades afectadas e unha seria falta de información”, o que é máis que preocupante se se ten en conta que “o BIC é un instrumento proxectado e imposto sobre o territorio”. “Non é posible levar a cabo a protección dunha área tan grande con medidas tomadas desde o Goberno galego pero sen contar coa participación activa da poboación”, defende Lídia Senra.
Así, a eurodeputada insta á CE a investigar que é o que está a pasar con este procedemento, tendo en conta que a UE pon bo énfase en protexer e valorar o patrimonio cultural europeo. Neste sentido, Senra considera que as Conclusións do Consello da UE sobre a Gobernanza participativa do patrimonio cultural (2014/C 463/01)[2] se están a incumprir neste caso, xa que inclúen que se “promoverá a participación das partes interesadas garantíndolles a posibilidade de participar en todas as fases do proceso decisorio”, algo que aquí non está a acontecer. “Non considera a Comisión que debería instar á Xunta de Galicia para garantir a participación da poboación afectada?”, pregunta a eurodeputada. Nun prazo de entre 4 e 6 semanas, a CE debería dar unha resposta ao escrito de Senra.
——————————————
[1] Pódese acceder a unha copia da pregunta rexistrada na Comisión Europea aquí:
https://ageuropa.gal/wp-content/uploads/2018/05/PE-BIC-Ribeira-Sacra-040518.pdf
[2] Pódese acceder ao documento de Conclusións aquí:
http://eur-lex.europa.eu/legal-content/PT/TXT/PDF/?uri=OJ:C:2014:463:FULL&from=ES
