- A eurodeputada reclámalle á CE que se posicione sobre a decisión municipal de rebaixar a prioridade na loita contra a violencia machista
- Critica que o Concello actúe así malia gozar dos fondos europeos que sostiñan os salarios de persoal especializado para atender o Centro
Santiago, 16 xaneiro de 2017. Lídia Senra, eurodeputada galega, integrada no Grupo Confederal da Esquerda Unitaria Europea/Esquerda Verde Nórdica (GUE/NGL), ven de denunciar no Parlamento Europeo o peche por parte do Concello do Centro de Información á Muller (CIM) de Ponte Caldelas. A europarlamentaria rexistrou este luns unha pregunta por escrito dirixida á Comisión Europea (CE), na que informa ao organismo comunitario sobre a decisión tomada a finais de decembro polo Concello de Ponte Caldelas, de pechar este servizo de titularidade municipal especializado en atención ás mulleres que leva dez anos funcionando e que se subvenciona, igual que os restantes 80 CIM que hai por toda Galiza, a través do Fondo Social Europeo (FSE).
Lídia Senra considera que a decisión de pechar dito centro en Ponte Caldelas non é para nada “acertada” e denuncia que o Concello está rebaixando así “o nivel de prioridade na loita contra a violencia machista e pola igualdade de xénero”. Neste sentido, a eurodeputada esíxelle á Comisión Europea que se posicione e pregúntalle á CE se considera que é “axeitado” que se pehe o CIM “a pesar de ter concedidos os fondos europeos que sostiñan os salarios de persoal especializado para atender as mulleres” neste concello.
“A violencia contra as mulleres é unha lacra social que require un combate diario e integral tanto de loita social como de servizos especializados”, argumenta Lídia Senra, quen engade que “no caso galego, estes centros son máis cercanos e normalmente os únicos no medio rural, xogando un papel fundamental na atención a vítimas de violencia machista, así como de promoción da igualdade de xénero”. Deste xeito, a eurodeputada critica que o Concello argumente que pecha o CIM para poder convertelo nun servizo de asesoría legal, que estará especializado non en atención a mulleres e casos relacionados coa violencia como até o de agora. “Entendemos que tamén é importante atender desafiuzamentos, problemas con subministracións e outro tipo de cuestións sociais, pero iso debe facerse a maiores”, defendeu.
Para Senra, a decisión tomada polo Concello non se sustenta e reclama que as forzas municipais implicadas recúen nesta medida e que o CIM siga funcionando como até o de agora. A maiores, a europarlamentaria pregúntalle á CE se ten previsto poñer en marcha medidas que obriguen á prestación destes servizos de forma permanente e estable por parte das entidades beneficiarias dos FSE, para poder achegalos nuns estándares de calidade e o máximo posible a todas as mulleres, sobre todo no medio rural.
