- Informa á Comisión Europea do mal funcionamento da Estación Depuradora e reclámalle que tome medidas para corrixir a situación
- A deputada advirte sobre salmónidos e demais especies que se están vendo afectadas pola contaminación de augas fecais no río Liñares
Bruxelas, 25 de abril de 2017. A eurodeputada galega Lídia Senra, integrada Grupo Confederal da Esquerda Unitaria Europea/Esquerda Verde Nórdica (GUE/NGL), ven de denunciar ante a Comisión Europea (CE) o mal funcionamento da Estación Depuradora de Augas Residuais (EDAR) da Estrada. Senra rexistrou este luns en Bruxelas un escrito dirixido á CE no que lle informa dos “continuos vertidos orgánicos que padece o río Liñares” e insta ao ente comunitario a tomar medidas para comprobar a situación de contaminación na que se atopa esta zona e forzar ás autoridades competentes na materia a corrixila.
A europarlamentaria galega considera “moi grave” o deterioro que está a sufrir a canle fluvial por mor de que a EDAR non depura ben as augas residuais do Concello da Estrada, e máxime tendo en conta que o río Liñares pertence ao Sistema Fluvial Ulla-Deza, incluido co Código ZEC ES1140001 como Lugar de Importancia Comunitaria na Rede Natura 2000. Lídia Senra coñeceu de primeira man a problemática, xa que a principios deste mes estivo na Estrada visitando o lugar no que se atopa a depuradora, na parroquia de Aguións, e tamén a zona da minicentral hidroeléctrica de Aldea Grande, onde se producen as verteduras. Acompañada por Mar Blanco, concelleira de Móvete na Estrada, a eurodeputada comprobou daquela como as verteduras son palpables a simple vista, xa que se apreza un limo agrisado por toda a zona e incluso un forte cheiro.
Tomando de base análises realizadas a principios deste ano por Axentes Facultativos Medioambientais, Senra denuncia na CE que se está a producir “un gran aporte de materia orgánica ou fecal directamente ao río”. A sedimentación dos fondos fai inviable o proceso de desove de salmóns, reos e troitas presentes no Ulla, para o que esta conca está catalogada como hábitat idóneo. Ademais, na canle fluvial habitan desmáns ibéricos, especie protexida catalogada como vulnerable e cuxa alimentación e vida se está vendo alterada negativamente por mor dos vertidos.
Tendo en conta todos estes datos e que a CE xa reprendeu ao Estado español en numerosas ocasións por mala calidade das augas en diversos puntos do territorio, Lídia Senra pregúntalle se non considera que o mal funcionamento da EDAR da Estrada vulnera a Directiva 91/271/CEE relativa ao tratamento das augas residuais urbanas e pídelle que atalle esta situación. A CE debería dar resposta por escrito a esta petición nun prazo de entre 4 e 6 semanas.
