- Reclama no pleno do Parlamento Europeo que se conte coas labregas e labregos para deseñar un plan de detección, control e investigación
- A eurodeputada de AGEe defende como “fundamental” que a UE se dote de mecanismos que sigan a súa presenza e desenvolvemento
Estrasburgo, 26 outubro 2016. Lídia Senra, eurodeputada de Alternativa Galega de Esquerda en Europa (AGEe), integrada no Grupo Confederal da Esquerda Unitaria Europea/Esquerda Verde Nórdica (GUE/NGL), reclamou no pleno do Parlamento Europeo que se está a celebrar esta semana en Estrasburgo, unha estratexia europea de loita contra as pragas nos vexetais e as especies invasoras que afectan ao territorio da UE. Lídia Senra defendeu como “fundamental” levar a cabo unha estratexia común que conte coa experiencia das labregas e labregos, para a detección precoz, o seguimento e a investigación destas especies e para a partir de aí poder establecer as actuacións precisas para previr, erradicar e impedir que as pragas e as especies invasoras se estendan.
A eurodeputada galega tomou a palabra este martes pola noite no debate sobre Medidas de protección dos vexetais contra as pragas, que se abordou na sesión plenaria da Eurocámara en Estrasburgo, para alertar de que “a globalización do comercio e o aumento das temperaturas provocado polo cambio climático están facendo aparecer novas pragas e enfermidades nas plantas e nas árbores. O caso da bacteria xylella fastidiosa é so un exemplo do que está acontecendo”. “Por iso é fundamental o control rigoroso e o seguimento do material vexetal que entra na UE”, dixo, para engadir que “tamén precisamos mecanismos para detectar a presenza e o desenvolvemento de pragas e especies invasoras que entran na UE coas importacións doutros produtos agrícolas, como foi a vespa velutina”. Senra chamou a definir protocolos comúns de actuación na loita contra as pragas e as especies invasoras, que protexan a saúde, o medio ambiente e as augas”.
