- Interveu no debate do pleno do Parlamento Europeo sobre o Marco da Unión para a recompilación, xestión e uso dos datos do sector da pesca
- A eurodeputada galega pide que os datos socioeconómicos e medioambientais sexan parte fundamental na recollida da información
Estrasburgo, 16 de marzo de 2017. A eurodeputada galega Lídia Senra, integrada Grupo Confederal da Esquerda Unitaria Europea/Esquerda Verde Nórdica (GUE/NGL) reclamou este xoves pola mañá, no pleno do Parlamento Europeo, que as novas normativas que está a promover a UE en materia pesqueira “non interfiran nunca no desenvolvemento normal das actividades da pesca artesanal e de baixura” e que en todo caso, “nunca se convertan nun pretexto para trasladar máis cargas económicas e administrativas para estas frotas”. Así o defendeu Senra durante o debate sobre o Marco da Unión para a recompilación, xestión e uso dos datos do sector pesqueiro, que tivo lugar a primeira hora de hoxe no hemiciclo de Estrasburgo.
A eurodeputada galega dixo compartir a idea de que é “moi importante contar con datos científicos rigorosos e de calidade para unha boa xestión das pescas”, pero defendeu que o novo Marco non vaia en detrimento da actividade da frota artesanal e de baixura. Así, pediu que a recollida e xestión dos datos “teña en conta as especificidades da frota artesanal” e que “os datos socioeconómicos e medioambientais se tornen nunha parte fundamental da información recollida”.
Lídia Senra reclamou que á hora de recoller os datos socioeconómicos se teña en conta e “se visibilice o papel e a situación das mulleres nas pescas: Mariñeiras, redeiras, mariscadoras e outras mulleres que traballan neste ámbito”. Do mesmo xeito, tildou de “necesario” que os umbrais baixo os cales non sexa necesaria a recollida de certos datos ou as campañas científicas a bordo se definan tamén atendendo ao tipo de frota e aos seu impacto nos recursos, tendo en conta, por exemplo, “que a pesca artesanal e local é máis sostible e que xeralmente usa artes de pesca máis selectivas que os grandes buques industriais”.
