- A eurodeputada participou este martes pola tarde nunha Conversa de Mulleres na Casa da Luz de Pontevedra, xunto ás compañeiras Tareixa Ledo, Peque González e Teresa Casal
- Critica que o PP non aplique a tolerancia cero coa violencia machista ao, por exemplo, incluír na lista electoral municipal de Curtis a un home condenado por maltrato
Pontevedra, 14 de maio de 2019. A eurodeputada Lídia Senra, candidata de En Marea: Compromiso por Europa ás eleccións europeas do 26 de maio, participou este martes pola tarde nunha Conversa de Mulleres organizada por Marea Pontevedra, xunto a Peque González, Tareixa Ledo e Teresa Casal.
Senra defendeu o feminismo como imprescindible para poder avanzar en todos os ámbitos, tamén por suposto na UE. Neste sentido, comprometeuse a seguir traballando para que as mulleres participen en pé de igualdade sempre e para rematar coa fenda salarial, coa fenda de xénero e coa violencia machista. Así, reclamou tolerancia certo cos maltratadores, tamén nas institucións e nas organizacións políticas e sociais e tachou de intolerable que o PP non actúe desta maneira, ao incluír, por exemplo, na lista electoral municipal de Curtis, a un home condenado por violencia machista.
Senra defendeu que a UE debe estar ao servizo das persoas e dos pobos, e que os dereitos humanos sempre deben estar por riba dos intereses do capital e chamou a poñer a vida no centro. Tamén defendeu como prioritaria a necesidade dunha maior formación en xénero para todas as persoas encargadas de aplicar a lexislación na materia.
